د چين د بين المللی راډيو د خبريال د خبر له مخی ، د چين د دولت رييس هو جين تاو د جون په ١٦ نيټه په تاشکند کی د افغانستان د انتقالی دولت د رييس حامد کرزي سره وکتل . کرزي د کوربه هيواد د ميلمه په توګه په تاشکند کی د شانګهای د همکارۍ د موسسې په سرمشريزه غونډه کی برخه درلوده .
د کتنی په ترڅ کی رييس هوجين تاو په افغانستان کی پر چينايي کارګرو باندي د تازه تروريستی بريد له امله خپله حيرانتيا او خواشينی څرګنده کړه . هغه وويل چه د چين حکومت او خلک نوموړي ظالمانه وينه تويوونکی کړه وړه سخت غندی . هغه په تاکيد سره وويل ، له تروريزم سره دمبارزی او درو تروريستی قواوو ته د ضربت رسولو په هکله د چين د حکومت اراده او عزم به هيڅکله بدل نه شی او چين به د تروريزم په ضد نړيواله مبارزه کی فعاله برخه واخلی .دغه شان به چين د پخوا په شان د چين او افغانستان ترمنځ د نيک ګاونډيتوب ، دوستۍ او د متقابلو ګټو پر بنا د همکارۍ د ټينګتيا او پياوړتيا لپاره هلي ځلی وکړي او د افغانستان دسولی او بيا رغاونی د بهير ملاتړ به وکړی او پکی برخه واخلی .
حامد کرزي وويل ، دافغانستان حکومت په هيڅ وجه هرراز تروريزم نه تحملوی او په ټينګه سره به تروريزم په پرله پسې توګه وځپی.
رييس کرزي له دي امله د چين له حکومت څخه مننه څرګنده کړه چه د افغانستان د سولی او بيارغاونی په کارکې دخپلو دوامدارو هلوځلو تياري يی بيا څرګند کړی دی .
