د چين د بين المللی راډيو د خبر له مخی، د پاکستان صدراعظم شوکت عزيز چه اوس په سنګاپور کی په سفر بوخت دی، د می په يوولسمه نيټه د جنوبی اسيا په باب د سنګاپور د څېړنې په مرکز کی يوه وينا وکړه او و يی ويل چه پاکستان به د هند او پاکستان تر منځ د سولې د بهير د پرمخبيولو لپاره دوامدار کوشش وکړی او د دواړو هېوادونو تر منځ به اقتصادی او تجارتی همکاری پياوړی کړی٠
عزيز وويل چه د جنوبی اسيا راتلونکی ثبات څلور بنسټونه د اړتيا وړ دی٠ لومړی، د جنوبی اسيا د بيلا بيلو هېوادونو تر منځ د دوه اړخيز ديالوګ او د څو اړخيزو خبرو اترو ميکانيزم جوړ شی٠ دوهم ، د جنوبی اسيا سيمه ايزه تاکتيکی همکاری پراخه شی٠ دريم ، د جنوبی اسيا د بيلا بيلو هېوادونو د خلکو تر منځ د اقتصاد او تجارت ، کلتور او ټولنو تر منځ تبادله پراختيا ومومی٠ څلورم ، د جنوبی اسيا او د جنوب ختيځی اسيا د هېوادونو په شمول د نورو سيمو تر منځ همکاری پياوړی شی٠
