د چين نړيوالې راډيو د خبر له مخې، د چين د دولت رئيس هو جين تاو د اګست په څوارلسمه نېټه د قرغزستان په پلازمېنه بشکيک کې د دغه هېواد له ولسمشر کورمنبيک باکايف سره خبرې اترې وکړې. دواړه مشران د دواړو هېوادونو تر منځ د ريښتنی همکارۍ، د سيمه ايزې سولې او ثبات ساتنې او په بېلا بېلو ساحو کې د شانګهای د همکارۍ سازمان په چوکاټ کې د همکارۍ د پرمخبيولو په اړه موافقې ته ورسېدل.
ښاغلي هو جين تاو د دواړو هېوادونو تر منځ د همکارۍ پراخوالي په هکله درې وړانديزونه وکړل، لومړی دا چې دواړه هېوادونه په فعاله توګه ريښتنې همکاري پرمخبوزي. دوهم د ترهګرۍ پر ضد مبارزه کې خپل منځي همکاري پياوړې کړي. درېيم د شانګهای د همکارۍ سازمان په چوکاټ کې د غړيو هېوادونو تر منځ متقابل اعتماد پياوړتيا او يووالي ته دوام ور کړي.
له خبرو اترو وروسته ښاغلي هو جين تاو او باکايف د دواړو هېوادونو تر منځ د ښه ګاونډيتوب اړيکو د ټينګښت په اړه يوه ګډه اعلاميه هم خپره کړه.
