د سين هوا اژانس د خبر له مخې، د امريکا د دفاع وزارت د جنورۍ په پنځلسمه نېټه اعلان وکړ چې د دغه هېواد پوځ به د روان کال په پسرلی کې افغانستان ته بيا دری زره او دوه سوه سرتېري وروليږي چې له مخې به يې له وسله والو کسانو سره د مبارزې لپاره له نړيوالو مرستندويه امنيتی ځواکونو او د افغانستان له ملی پوځ سره مرسته وکړي.
ولسمشر جورج بوش په همدې ورځ د دفاع وزير روبيرت ګېټس وړانديز ومانه او افغانستان ته يې د زياتو سرتيريو ليږلو حکم ورکړ. وروسته د دغه هېواد دفاع وزارت د يوې اعلاميې په خپرولو سره څرګنده کړه دغه عمل به د افغانستان د ملی پوځ د تمرين او د نړيوال مرستندويه امنيتی ځواکونو له خوا د زياتو برياليتوبونه تر لاسه کولو لپاره ګټور وی.
د امريکا د خبري رسنيو په وينا دغه عمل نه يوازی د روان کال په پسرلی کې د وسله والو طالبانو د بريدونو د بيا پيل په اړه د امريکا د انديښنې څرګندوي، بلکې دا هم څرګندوي چې د بوش په مشرۍ د امريکا حکومت افغانستان ته د زياتو سرتېريو د لېږلو په اړه په ناتو کې خپل نور ملګري هېوادونه نه دي قانع کړي.
