د چين نړيوالې راډيو د خبر له مخې، د اولمپيک د نهه ويشتمې دورې لوبو د همغږۍ کمېټې لسمه عمومي غونډه د اپريل د درېيمې نېټې له غرمې وروسته په بېجينګ کې پای ته ورسېده. د همغږۍ کمېټې مشر هېن ويربروګن په دغه غونډه کې د بېجينګ اولمپيک لوبو لپاره د تياريانو لوړه ستاينه وکړه.
نوموړي له دغې غونډې وروسته په يوه خبري ناسته کې د بېجينګ اولمپيک لوبو لپاره له تياريانو څخه د زيات ملاتړ په اړه د چين له حکومت څخه مننه وکړه. نوموړي څرګنده کړه چې تر اوسه پورې د بېجينګ اولمپيک لوبو په اړه کارونه په روان حال کې دي او دغه لوبې به هرومرو د ټولې نړۍ لپاره قيمتي ميراث پرېږدي.
