د چين د نړيوالې راډيو د خبر له مخې، د پولند د بهرنيو چارو وزير رادوسلوا سيکورسکي د جون په څلورمه نېټه د افغانستان په پلازمېنه کابل کې څرګنده کړه چې پولند به د څو مليون امريکايی ډالرو په لګولو سره د سرتيريو او پوليسو تمرينولو او بيا ابادۍ په چارو کې له افغانستان سره مرسته وکړي.
نوموړي د افغانستان د بهرنيو چارو له وزير رنګين دافر سپنتا سره له کتنې وروسته څرګنده کړه چې پولند به نه يوازې د سرتيريو او پوليسو د روزلو په برخه کې له افغانستان سره خپلو مرستو ته دوام ورکړي، بلکې له اروپايی ټولنې څخه هم د مرستو غوښتنه وکړي.
د افغانستان د بهرنيو چارو وزير ښاغلي سپنتا په وينا پولند دا ژمنه هم کړې چې د ديپلوماتانو او مطبوعاتي کارکوونکيو د روزلو په برخه کې له افغانستان سره مرسته وکړي چې په ترڅ کې يې تر اوسه څوارلس تنه افغان مطبوعاتي کارکوونکي د زده کړې لپاره پولند ته تللي وو.
