د چين د ملې جشن يوه لويه مېلمستيا تر سره شوه
د چين د نړيوالې راډيو د خبر له مخې: د نوي چين د جوړېدو د شپېتمې کاليزې د نمانځنې لپاره د چين دولتي شورا د سپټمبر ٣٠ مې نېټې په شپه بېجينګ کې يوه ستره مېلمستيا جوړه کړه چې د چين د دولت رئيس هو جين تاو او د يو شمېر نورو مشرانو پر سربېره څه دپاسه څلور زره چيني او بهرنيو شخصيتونو په کې ګډون درلود.
صدراعظم ون جياباو په ياده شوې مېلمستيا کې د خپلې وينا په ترڅ کې وويل، په تېرو شپېتو کلونو کې ټول برياليتوبونه د چينايانو، د کمونېست ګوند او د چين د ځانګړتيا لرونکي سوسياليزم له خوا تر لاسه شوي دي. هغه زياته کړه موږ بايد د اقتصاد چټک پرمختګ همداسې پياوړی وساتو چې د نړيوال اقتصاد د پرله پسې پرمختګ لپاره خدمتونه وکړو. موږ بايد د قومي سيمو د خپلواکو ادارو نظام ټينګ او قومي مذهبي تګلارې پلې کړو . بر سېره پر دې، موږ بايد په يو هېواد کې د دوو نظامونو تګلارې او د يو چين د پېژندلو پر اصولو ټينګار وکړو.
د راتلونکي اکتوبر د لومړۍ نېټې په لسو بجو به د تيان ان من په لوی ډګر کې د پلازمېنې بېلا بېلې ټولنې د نوي چين د جوړېدو د شپېتمې کاليزې د نمانځنې لپاره يوه ستره غونډه جوړه کړي، رئيس هو جين تاو به په دغه غونډه کې يوه وينا وکړي او وروسته به ستر پوځي پرېډ تر سره شي.