روسيه به د ناګورنو قره باغ سيمې ته سوله ساتونکی پوځ وليږي
د روسيې فدرالي کمېټې د نومبر په ۱۸مه نېټه موافقه وکړه چې د ناګورنو قره باع سيمې ته د دغه هېواد سوله ساتونکي پوځ وليږي، څو په دغه سيمه کې د اوربند تړون ښه تطبيق شي او د ملکي وګړيو د مرګ ژوبلې او د عامه ځايونو د ويجاړېدو مخنيوی وشي.
د روسيې ولسمشر ولادمير پوتين د نومبر په ۱۷مه نېټه له خبريالانو سره په مرکه کې وويل، د ناګورنو قره باغ په سيمه کې د نوې دورې شخړې له امله سخته مرګ ژوبله رامنځته شوې ده، په دې سيمه کې د وينې تويدو ختمېدل د روسيې، اذربايجان او ارمنستان د دريو خواوو اعلاميې تر ټولو مهم برياليتوب دی.
د ترکيې پارلمان د نومبر په ۱۷مه نېټه اذربايجان ته د خپل سوله ساتونکي پوځ د ليږدولو پېشنهاد تصويب کړ چې د ناګورنو قره باع په سيمه کې د اوربند تړون د تطبيق حالت وڅاري. (هيله)