په قطر کې د طالبانو د دفتر د پرانستلو پړاوونه په بشپړېدو دي

تاند(چهارشنبه/دسمبر۱۴) د هند یوې معتبرې ورځپاڼې(هندو) د هند د یپلوماتیکو سرچینو په قول راپور ورکړ چې په قطر کې د طالبانو د دفتر د پرانستلو لپاره وروستي تدابیر د بشپړېدو په حال کې دي خو دا دفتر به سره له دې چې افتخاري وي له رسمي دیپلوماتیک تحفظه برخمن نه وي.

د دې مسلې پر تفصیلاتو د ملاعمر له جګپوړو استازو او همداراز د قطر او متحده عربي اماراتو د مقاماتو ترمنځ موافقه شوې ده.

هندو ورځپاڼه وايي چې تراوسه پوري افغان طالبانو په دې اړه څه نه دي ویلي.

خو د افغانستان د بهرنیو چارو وزارت څو ساعته وروسته په یوه اعلامیه کې له قطر څخه په افغانستان کې د سولې په پروسه کې د مرستې په خاطر مننه وکړه.د افغانستان د باندنیو چارو وزارت په عین حال کې په قطر کې د افغانستان سفیر کابل ته وروباله.د بهرنیو چارو وزارت د خپل سفیر د ورغوښتلو د دلیل په اړه څه نه دي ویلي.

دې مسلې ته په پام سره کېدای شي چې په کابل کې په اوسني دولت کې له یوشمېر زورو کسانو سره د ولسمشر حامد کرزي پرونۍ مشورتي غونډه بې ارتباطه نه وي. حامد کرزي پرون د ارګ په وینا له جهادیانو سره په غونډه کې د سولې په پروسه خبرې وکړې. د ارګ په خبرپاڼه کې نه وو ویل شوي چې دوی دقیقاً څه وویل او نتیجه یې څه وه.

خو د افغانستان د بهرنیو چارو وزارت په اعلامیه کې ویل شوي:«په افغانستان او سیمه کې وروستیو انکشافاتو او د افغانستان او قطر د اړیکو په تړاو په دوحې کې د افغانستان سفیر خالد احمد ذکریا د سلامشورو لپاره بلل شوی دی.د دواړو هیوادونو ترمنځ دیپلوماتیکې اړیکې به په دوحې کې د افغانستان د سفارت د شارژدافېر په وسیله دوام وکړي.»

هندو ورځپاڼه وايي چې هڅه یې کړې چې د افغانستان له بهرنیو چارو وزارت سره تماس ونیسي چې خپل سفیر یې ولې وربللی خو بریالۍ شوې نه ده.

د سې شنبې په ورځ د لومړي ځل لپاره د پاکستان حکومت وویل چې نور دې ته تیار دی چې په افغانستان کې یو خپلواک او د ملي حاکمیت درلودونکی حکومت ومني.

پاکستان همداراز ومنله چې د افغانستان د سولې د عالي شورا وژونکی له پاکستان څخه افغانستان ته تللی و خو هغه یو افغان مهاجر و.

که طالبان د قطر په شان په یوه درېمګړي هیواد کې د دفتر پرانستلو ته پرېښوول شي دا هیله زیاته ده چې د پاکستان له اغېزه پرته د خپلو ملي ګټو په رڼا کې پرېکړې وکړي.