په قرغېزستان کې د چين پر سفارت د بريد له امله مرګ ژوبله رامنځته شوه

د چين نړيوالې راډيو د خبر له مخې، د اګست د ٣٠مې نېټې په سهار د قرغېزستان په پلازمينه بېشکيک کې د چين په سفارت کې چاودونه وشوه. د قرغېزستان د روغتيا وزارت د خبر له مخې، د دې چاودنې له امله ١ تن مړ او ٣ تنه نور ټپيان شوي دي.

د چاودنې له رامنځته کېدو وروسته د پېښې په ځای کې د قرغېزستان د صدراعظم مرستيال جنيش رزاکوف وويل، دغه چاودنه د يو ځانمرګي بريدکوونکي له خوا جوړه شوې. بريدکوونکي خپل موټر د چين سفارت له دروازې سره وهلی. بريدکوونکی سمدلاسه مړ شوی و او ٣ قرغېزستاني کارکوونکي ټپيان دي.

له چاودنې وروسته د قرغېزستان پوليس، ملي امنيتي کميټه، د بېړني حالت وزارت، د اطفايې ډله او طبي څانګه ژر د پېښې ځای ته ورسېدل . د قرغېزستان امنيتي څانګه د دې پېښې په پلټنه بوخته ده.

تر اوسه پورې په قرغېزستان کې د چين سفارت د دې پېښې په اړه هيڅ خبر نه دی خپور کړی.

(ياسمين)