د بخار په واسطه د کب پخول او خوږ او تريو کب خواړه

د غذايت له نظره کب د نورو غوښو په نسبت د انسان روغتيا لپاره ډېره ګټه لري. د علمي څېړنې له مخې د کب په غوښه کې کلسترول د نورو غوښو نه کم دي. خو البومين يې ډېر زيات دی. نو د کب د غوښې خوړل د صحت خصوصا د زړه او د وينې فشار ناروغيو د مخنيوي لپاره ډېر ه ګټه لري. د توجه وړ خبره دا ده چې په ورځني ژوند کې د کب غوښې د خوړلو عادت ساتي. د بخار په واسطه د کب غوښې پخول ډول ډول دي. هغه کب چې په بخار پخول کېږي، ډېر مزه دار وي، د جوړولو طريقه يې دا ده. لومړی دې د سيند يا سمندر څه نا څه نيم کيلو کب، لږ څه مالګه، شنه دنيه، شين پياز، ادرک، اوږه او نيم کيلو غوړي تيار شي. د کب له پاکولو وروسته په چاړه پر کب پرېکړئ. شنه دنيه ميده ميده کړئ، له دې وروسته په ديګ کې برابره غوړي واچوئ څو چې غوړي سره شي، کب پکې واچوئ. کله چې د کب دوه مخونه لږ ژيړ شي، سمدلاسه يې له غوړو څخه راوباسئ او په يو پشقاب کې يې کېږدئ، بيا نوموړې مالګه، ادرک او اوږه پر کب باندې او شاوخوا کې واچوئ او لږ څه اوبه هم ور سره ګډې موي. وروسته بيا دغه پشقاب په يو لوی ديګ کې چې اوبه پکې وي واچوئ. بيا ديګ د قوي اور دپاسه کېږدئ او سرپوښ يې پټ کړئ. تر پنځلس يا شل دقيقې وروسته به کب په بخار کې پوخ شي. د سرپوښ تر خلاصولو وروسته شنه دنيه پر کب باندې وشيندئ. په دې طريقې سره نوموړي خواړه تيارېږي. د دغه خوراک خصوصت دا دی چې د کب غوښه ډېره نرمه او تازه ده او ډېر خوند او ښه بوي لري.

د اړوندې علمي څېړنې له مخې، د کب غوښه د نورو غوښو په نسبت د انسان روغتيا لپاره زياته ګټه لري. د امريکا په يوه تحقيقاتي راپور کې ويل شوي چې په امريکا کې د هغو کسانو شمېر چې د وينې فشار او زړه په ناروغيو اخته شوي د جاپانيانو په پرتله ډېر زيات دی. يو مهم علت يې دا دی چې جاپانيان د کبانو خوړلو عادت لري. په چين کې ډېر خلک هم د کب خوړلو عادت لري او د کب پخولو طريقې هم بېلا بېلې دي. مثلاٌ په شمالي چين کې له کب څخه د خواړو جوړونه عموماٌ په دې ډول ده چې لومړی کب په غوړو کې سره کړي چې دوه مخونه يې ژيړ رنګ شي، بيا بېلا بېلې مسالې لکه ادرک، پياز، اوږه او داسې نور ور سره يو ځای په ديګ پخوي او د پنځلس يا شل دقيقو تر پخولو وروسته بيا تيار شو چې دغه ډول خوراک ته د سور رنګ کب وايي. خو په جنوبي او ختيځ چين کې له دې امله چې له سيندونو او سمندر سره نژدې دی، نو د کب پخولو طريقې نسبتاٌ ډېرې زياتې دي. لکه د کب پر ه، د سره شوي کب، خوږ او تريو کب او داسې نور. د خوږ او تريو کب خواړه يو ډول ډېر خوندور خواړه دي. د دغه خوراک د جوړولو لپاره لومړی يو برابر کب چې لږ غشي يا هډوکي ولري، لس ګرامه بوره، برابره سرکه، سل ګرامه نشايستوي مواد، لږ څه سرکه، ادرک، پياز، اوږه، مالګه او نيم کيلو غوړي تيار کړي. بيا کب پاک ومينځي او پرونه يې لېرې کړي. وروسته په يو ديګ کې برابر غوړي واچوي او ديګ د اور دپاسه کېږدي. کله چې غوړي سره شي، نوموړی کب پکې واچوي، خو اور لږ څه نرم کړي. کله چې د کب دوه مخونه ژيړ رنګه شول. له غوړيو څخه راوباسي. ور پسې په يو بل ديګ لږ څه غوړي واچوي چې غوړي سره شي. ادرک، پياز او اوږه چې ميده ميده شوي وو، پکې واچوي تر څو ژيړ رنګ او خوش بوي پيدا کړي، بيا لږ شالې اوبه، برابره مالګه، بوره او سرکه پکې واچوي، تر څو برابره ښوروا جوړه شي. کله چې ښوروا په جوش راغله. په نوموړي کې کب واچوي او د لس دقيقو لپاره يې جوش کړي. کله چې کب پوخ شو، نو نشايستوي مواد پکې واچوي او و يې لړي. تر هغه وخت يې په اور پرېږدي چې تر دې وروسته خواړه تيار کړي چې په خوند سره يې وخوري.