د شينجيانګ په کاشغر کې د زلزلې له امله اته تنه ووژل شول

د سينهوا اژانس د خبر له مخې، د مې د يوولسمې نېټې سهاروختي په شاوخوا شپږو بجو د کاشغر سيمې د تاشقورغان تاجک په خودمختاره ولسوالۍ کې د رېکتر په کچه ۵.۵ درجه زلزله وشوه. د ابتدايي شمېرنې له مخې، د زلزلې له امله اته تنه وژل شوي او يوولس تنه نور ټپيان شوي دي.

اوس د ژغورنې کارونه روان دي، ټپيان روغتون ته ليږدول شوي دي. د زلزلې له امله د رامنځته شوې مرګژوبلې او زيانونو حالت د پېژندنې په حال کې دي.

د چين د زلزلې ادارې  د څارنې له مخې، د دې زلزلې د مرکز ژوروالی تر ځمکې لاندې اته زره متره دی، د زلزلې مرکز په شاوخوا  شلو کيلومترو کې کابو ۵۸۰ تنه شته. (هيله)