CRI Online

يو لړ سپورتي خبرونه

cri     (GMT+08:00) 2017-10-31 16:21:10
ډین جونز: افغانستان د کرکټ یو با ثباته ټیم ته ضرورت لري

له هانګ کانګ سره د افغانستان د څلور ورځنیو سیالیو روزونکی ډین جونز وايي د افغان لوبغاړو په فزیکي جوړښت- فټنس- باندې باید ډېر کار وشي.

فزیکي فټنس په دې مانا چې لوبغاړي باید روحآ او جسمآ غښتلي وي او د لوبې کولو ډېره شیمه ولري. ډین جونز وايي ده له افغان لوبغاړو سره په دغې برخه کې هره ورځ کار کاوه او افغان لوبغاړي باید له دې پلوه لا غښتلي شي.

هغه وویل افغان لوبغاړي باید خپل غذايي رژیم ته هم پام وکړي، په دې مانا چې باید داسې خواړه ونخوري چې وزن یې زیات او صحت یې ته زیانمن شي.

ده همدغه رازد افغانستان د لوبډلې په ترکیب هم خبرې وکړې او وویل "افغانستان یوه باثباته لوبډلې ته اړتیا لري، داسې لوبډله نه چې هره ورځ بدله شي".

هغه وویل فکر نکوي چې په راتلونکو دوه دریو میاشتو کې دې په لوبډلې کې کوم تغیر راشي، خو وویل که کوم لوبغاړی زخمي او یا لوبه ونشي کړې، دوه درې داسې لوبغاړي شته چې د هغوې په ځای لوبه کولی شي. خو، هغه د کوم مشخص لوبغاړي نوم وانخیست.

ده په میدان کې د لوبډلې پلانینګ او فیلډینګ ته هم اشاره وکړه "دوی- افغان لوبغاړي- باید د لوبې پلان ښه کړي، دوې باید پوه شي چې څوک په سليپ کې ودریږي او څوک توپوهونکي ته نژدې وي.....".

د اسټرالیا دغه مخکني لوبغاړي همدغه راز د افغان لوبغاړو د رواني حالاتو په ښه کېدو هم ټېنګار وکړ "بله مهمه خبره دا ده دوې چې له نورو لوبډلو سره لوبیږي باید د هغوې له نومونو او جامو څخه ونه ډار شي، باید په ځان باور ولري". هغه وویل که دا کار وکړي شاید قوي لوبډلو ته هم ماتې ورکړې.

د افغانستان کرکټ بورډ د ډین جونز د خبرو ویډیو په خپلې رسمي فیسبوک پاڼې خپره کړې ده. بورډ شاوخوا درې اونۍ مخکې ډین جونز له هانګ کانگ سره څلور ورځنۍ سیالۍ لپاره د لوبډلې روزونکی وټاکه.

''اته میلیونه ډالر به د کابل کرېکټ لوبغالي پر معیاري کېدو ولګول شي''

د افغانستان کرېکټ بورډ په کابل کې د کرېکټ لوبغالي پر معیاري کولو څه باندې اته میلیونه ډالر لګوي.

د افغانستان کرېکټ بورډ چارواکي وايي، د کرېکټ اوسنی لوبغالی به پراخیږي او په معیاري ډول به جوړيږي چې ۲۰ زره کسان به پر یو وخت په کې ځای شي.

په کابل کې د الکوزي په نوم اوسنی لوبغالی شاوخوا اوو زه کسان ځایوي. کرېکټ بورډ وايي، د لوبغالي چارې به راتلونکي پسرلي کې پیل کړي.

د افغان کرېکټ بورډ مشر عاطف مشعل وايي، د معیاري لوبغالي تر څنګ به د کورنیو او بهرنیو لوبغاړو لپاره مېلمیستون، د بورډ لپاره نوی دفتر او د کرېکټ روزنې یوه معیاري اکاډ‌مي هم جوړېږي.

ښاغلي مشعل وايي، کابل کې به دوه نور لوبغالي هم جوړ شي، خو لا یې وخت او ځای معلوم نه دي.

څه باندې څلور میاشتې مخکې افغانستان د کرېکټ نړیوالې شورا بشپړ غړیتوب تر لاسه کړ، چې د همدې غړیتوب له امله به د اتو کالو لپاره ای سي سي یا د کرېکټ نړیواله شورا هر کال افغانستان کرېکټ بورډ ته څه باندې ۳۱ میلیونه ډالره بودیجه ور کوي.

د افغانستان کرېکټ ملي لوبډله په ۱۹۹۵ کال کې جوړ شوې ده او په کم وخت کې یې خورا ډېر پرمختګ کړی دی.

وراټ کوهلي د خورا چټکو ۹۰۰۰ منډو ریکارډ جوړ کړ

هند په دریمه یوه ورځنۍ لوبه کې د یکشنبې په ورځ نوي زېلنډ ته په شپږو منډو ماته ور کړه او د دې لړۍ د دوو سیالیو په ګټلو سره یې دا لړۍ خپله کړه.

په کانپور کې د دې سیالیو په دریمه ورځ د کوربه لوبډلې مشر وارټ کوهلي او روهت شرما د سلیزو په جوړولو سره ۳۳۷ منډې جوړې کړې، خو مېلمه لوبډلې د اوو ویکټو په بایللو سره ۳۳۱ منډې وکړې.

له دې مخکې هم کوهلي او شرما ۲۰۰ منډې په ګډه وکړې، په دې سیالیو کې کوهلي په دویمه یو ورځنۍ لوبه کې د سلیزو شمېر ۳۲ ته ورساوه.

هغه په یو ورځني نړیوال کرېکټ کې هم د ډېرو سلیزو کولو سره د نامتو لوبغاړو په نوملړ کې دویم ځای لري.

په دې نوملړ کې سچن تندولکر ۴۹ سلیزو سره لومړی ځای لري.

له کوهلي سره بل لوبغاړي روهت شرما هم یوه ورځنیو سیالیو کې د خپلو سلیزو شمېر ۱۵ ته ورساوه او د ۱۴۷ منډو په جوړولو سره وسوځېد.

د هند د ملي لوبډلې مشر کوهلي په دې سیالۍ کې د نهه زره منډو جوړولو سره نړیوال ریکارډ ټینګ کړ.

نوموړي په خپله ۲۰۲ سیالۍ او ۱۹۴ پاڼۍ یا اننګ کې دا نوم خپل کړ.

له دې مخکې دا ریکارډ د سوېلي اسیا له توپ وهونکي اې بي ډي ویلیرز سره و چې ۲۰۵ پاڼیو کې په لوبېدلو سره یې ۹۰۰۰ منډې جوړې کړې وې.

اړوندې ليکنې
د مېلمنو ليکنځای