د سوريې په شمال کې د موټر بم چاودنې له امله شلو کسانو ته مرګژوبله واوښته

د سينهوا اژانس د خبر له مخې، د دسمبر په ۲۳مه نېټه، د سوريې د شمال رقه ايالت د تيرابيد ښارګوټي په سورق کلي کې د موټر بم چاودنه وشوه چې له امله يې ۵ عام وګړي ووژل شول او ۱۵تنه نور ټپيان شول. د دغه بريد له امله په سيمه کې کورونه او بنستيز تاسيسات هم ويجاړ شوي دي.

د مالوماتو له مخې، ترکي ځواکونو او د دوی تر ملاتړ لاندې د سوريې مخالفو ډلو د اکتوبر په ۱۳مه نېټه سورق ونيوه او له دې وروسته ګڼ شمېر ځايي وګړي نورو سيمو ته کوچيدلي دي. (شکريه)