د چين اقتصاد ولې چټک سمسور کېږي؟

سږ کال د کوويدـ۱۹ ويروس له امله د چين د لګښت بازار ډېر اغېزمن شوی دی. اوس په چين کې ياد ويروس کنټرول شوی او د لګښت بازار يې ښه تمايل لري. د چين د کلتور او سيلانۍ وزارت د جون په ۲۷مه نېټه يوه شمېرنه خپره کړه، چې له مخې يې د ښامار کښتۍ اختر په تېرې درې ورځنۍ رخصتۍ کې ۴۸ ميليونو او ۸۰۹ زرو کسانو د هېواد دننه سفرونه کړي او په دې برخه کې ۱۲ ميليارډ او ۲۸۰ ميليونه يوانه عايدات تر لاسه شوي دي. دا د چين د اقتصاد د بيا سمسورتيا يوه نښه ده.

د نړيوال پولي صندوق د اټکل له مخې، نړيوال اقتصاد به په ۲۰۲۰ کال کې ۴.۹ فيصده ټيټ شي، خو چين به يوازينی هېواد وي چې په ۲۰۲۰ کال کې به اقتصادي زياتوالی ولري. په داسې حالت کې به بېلابېل نړيوال شرکتونه له چين سره زياتې سوداګرۍ وکړي. د چين په ګوانګو جو ښار کې د ۱۲۷مې دورې په معاملوي نندارتون کې د ۲۱۷ هېوادونو او سيمو سوداګرو خپل نومونه ثبت کړي او تجارت يې پيل کړی دی. په چين کې د نېستول (Nestle) شرکت مشر رشيد قريشي وويل، چې په داسې وخت کې مو ځکه خپله پانګونه زياته کړه، چې موږ د چين د بازار او د صنعت د راتلونکی په اړه ډېر باور لرو.

ولې د چين اقتصاد په چټکه توګه بيا سمسور کېږي؟ د چين کمونېست ګوند او حکومت تل د خلکو امنيت او روغتيا ته لومړيتوب ورکوي، په علمي توګه د ويروس د وقايې او کنټرول چارې او د کارونو او توليدي چارو د پيل کولو چارې تنظيموي او د دې هېواد د اقتصاد د چټکې سمسورتيا لپاره ښه شرايط برابروي. د ۱ ميليارډو او ۴۰۰ ميليونو چينايانو بازار د چين د اقتصاد لپاره کلک ملاتړ برابروي، چين د بشپړې صنعتي لړۍ، غښتلي تخنيکي توان او کافي استعداد لرونکو کسانو پر مټ د اقتصادي سيالۍ غښتلی ځواک ساتلی دی. د دې ترڅنګ، چين تل ورخلاصون ته وده ورکوي، د ورخلاصون يو لړ تدبيرونه نه يوازې نړۍ ته د پرمختګ فرصتونه برابروي، بلکې د خپل ځان لپاره هم لويه نوې دروازه پرانيزي.

(فرشته)