شينجيانګ د نړيوال طبي خدمتي مرکز جوړونه چټکه کړې

ازبکستاني مېرمن ګلي مخکې ماشوم نه درلود يعنې شنډه وه او ډاکټر هغې ته ويلي وو چې تاسو نه مور کېږئ، نو له درملنې څخه لاس واخلئ. هغې د لږې هيلې په لرلو سره د شينجيانګ اويغوري روغتون ته ولاړه او هلته تر درملنې لاندې وه. د حيرانتيا وړ ده چې تر درملنې وروسته هغه يوه مور شوه. له دې امله ګلي د چين له ډاکټرانو څخه ډېره مننه کوي. هغې خبريال ته وويل

((د چين له ډاکټرانو سره ډېره مينه لرم، دوی ما سکه خور بولي. د چين طبي شرايط ډېر غښتلي دي. ))

مېرمن ګلي له هغو بهرنيو ناروغانو څخه يوه ده چې د چين د شينجيانګ د اويغوري خپلواکې سيمې له نړيوال طبي خدمتي سيسټم څخه يې ګټه اخيستې ده. د يو کمربند او يوې لارې وړانديز تر وړاندې کېدو وروسته، شينجيانګ د خپلې جغرافيايي وړتيا او د ګاونډيو هېوادونو په نسبت د مخکښې طبي سويې په کارولو سره د دغو هېوادونو لپاره د نړیوال طبي خدمتي مرکز د جوړولو لپاره کوښښونه کړي او د طبي خدمت په برخه کې يې نړيوالې تبادلې او همکارۍ پياوړې کړې دي. د شينجيانګ د خلکو روغتون مرستيالې معينور نياز په دې اړه ښې تجربې لري او د دې په اند، شينجيانګ د نړيوال طبي خدمتي مرکز د جوړولو په برخه کې طبيعی وړتياوې لري. دې وويل

((فکر کوم چې بهرني ناروغان د درملنې لپاره شينجيانګ ته راتلل يو ګټور کار دی، څرنګه چې شينجيانګ ښه طبي تخنيکونه لري او د جګپوړې طبي خدمت په اړه لګښت يې مناسب دی. برسيره پر دې، موږ ورته کلتور او ژبې لرو، دا هم د ګاونډيو هېوادونو د ناروغانو د راجلبولو يو لوی لامل دی.))

د بهرنيو ناروغانو د زياتېدونکو طبي اړتياوو د پوره کولو لپاره، د شينجيانګ ځايي روغتونونو يو لړ تدبيرونه نيولي دي. د شينجيانګ د خلکو له روغتون نه پرته چې د لسګونو کلونو لپاره پکې نړيواله طبي خدمتي څانګه جوړه شوې ده، د شينجيانګ د طب پوهنتون په اړه د لومړي روغتون په شمول پنځو روغتونونو کې نوې نړيوالې طبي خدمتي څانګې هم جوړې شوي او هغه طبي کارکوونکي پکې ګمارل شوي چې د ګاونډيو هېوادونو ژبې ويلی شي او د بهرنيو ناروغانو لپاره يې اسانتياوې برابرې کړي. اوس په دغو پنځو روغتونونو کې د بهرنيو ناروغانو لپاره ۵۰۰ کټونه چمتو شوي او د منونکو بهرنيو ناروغانو عمومي شمېر يې لسګونو زرو ته رسېدلی دی.

بهرنيو ناروغانو ته د طبي خدمت د برابرولو په عين وخت کې د شينجيانګ طبي سويه هم د ګاونډيو هېوادونو د پاملرنې وړ ده. د نړيوال طبي خدمتي مرکز د جوړولو له امله د شينجيانګ او ګاونډيو هېوادونو ترمنځ طبي همکارۍ ته مهم فرصت برابر شوی دی. د شينجيانګ روغتيايي ادارې او اړوندو ادارو د وړ کسانو د روزنې، طبي همکارۍ او علمي څېړنې په برخو کې د قزاقستان او تاجکستان په شمول د منځنۍ اسيا له ځينو هېوادونو سره څو قطبيزې تبادلې او همکارې کړې دي. د شينجيانګ د خلکو روغتون مرستيالې معينور نياز وويل

((په دې وروستيو کلونو کې شينجيانګ د طبي چارو او علمي څېړنې په برخو کې ګړندی پرمختګ کړی دی. د ګاونډيو هېوادونو د طبي ادارو څو پلاويو د شينجيانګ له روغتونونو څخه ليدنې کتنې کړې او زده کړې يې کړې دي. د ګاونډيو هېوادونو د روغتيايي ادارو په بلنه زموږ د کارپوهانو پلاوي هم د تبادلې لپاره دغو هېوادونو ته لاړل. د ګاونډيو هېوادونو د ناروغانو لخوا د شينجيانګ د طبي خدمتي مالوماتو د پېژندلو لپاره، په ځينو روغتونونو کې د روسيې او انګليسي ژبو ويبپاڼې پرانيستل شوې چې له دې څخه د چين طبي وړتياوې او اغېزې څرګندېږي.))

اوس د چين د کمونېست ګوند او دولت تر قوي ملاتړ لاندې، په شينجيانګ کې د نړيوال طبي خدمتي مرکز جوړونه روانه ده. دغه بازار ستر پټ ځواک لري.