د بيجينګ د لارو کوڅو سپين ږيری نقشه کښ

لارې کوڅې او هغه ودانۍ چې سی هه يوان نومېږي او ساختماني بڼه يې مربع ده چې په څلورو خواوو کې خونې دي او په منځ کې انګړ دی ، د بېجينګ د نښان په توګه ګڼل کېږي. د جګو او عصري ودانيو ترشا متقاطع لارې کوڅې يوه شبکه جوړوي. نو د زياتو سيلانيانو په اند بېجينګ يو عجيب ښار دی چې له يوې خوا يې يو عصری ښار دی، خو له بلې خوا د سي هه يوان ودانيو او لارو کوڅو په موجوديت ددې ښار لرغونی تاريخ ترې انځورېږي. نو په نننۍ کړۍ کې به تاسو ته يو سپين ږيری دروپيژنم چې د بېجينګ له ګوټ ګوټ سره ډېر بلد دی.

د بېجينګ لرغونی لارې کوڅې تنګې دي او هرې خوا ته غځېږي چې لکه يو بوډا پخوانۍ زمانه ښه پيژني. د لارو کوڅو په دواړو غاړو سي هه يوان ودانۍ قطار په قطار ولاړې دي او دروازې يې همېشه خلاصې وي او د لمر زرينې وړانګې په انګړ غوړيږي. په تېره بيا په منی موسم کې د لمر د زرينو او طلايي پلوشو سره جوخت اسمان تک شين وی. که تاسی د بېجينګ له عامو وګړيو څخه دغسی پوښتنې وکړئ چې په بېجينګ کې څومره لارې کوڅې شته، اوږدوالی يې څه دی او کومې کومې ځانګړتياوې لری ؟ زياتره يې مفصل ځوابونه نه کېږي.

يو اتيا کلن سپين ږيری چې شو لياو نومېږي ، په تېرو شلو کلونو کې د بېجينګ ټولو لرغونی لارو کوڅو سيل کړی و چې مقصد يې د دغو لارو کوڅو په هکله د معلوماتو ثبتول دي .بېجينګ د سپين ږيري شو لياو ټاټوبی دی او د تيرې پيړۍ له اتمې لسيزې څخه يې د لارې کوڅو په سيل پيل وکړ. په هغه وخت کې د ده په غاړه همېشه يوه کمره وځوړنده وه . هغه وويل،و مې غوښتل چې د کمرې په وسيله د لارو کوڅو تاريخ ثبت کړم او وروسته په دې هکله يو کتاب وليکم. د تيرې پيړۍ په اتمه ليسزه کې خلکو د هستوګنې شرايطو د ښه والي قوي غوښتنه وکړه. فکر مې کولو چې ښايی دغه ولسي ودانۍويجاړې شي، نو پرېکړه مې وکړه چې د کمرې په وسيله دغې قديمي ودانۍ ثبتې کړم او د ١٩٨٧ کال د مارچ له لومړی نېټې څخه مې د بيجينګ لارو کوڅو اوږدمهالي سيل پيل کړ.

ښاغلي شو د بېجينګ په جنوب يوه کوڅه کې لوی شوی، نو له لارو کوڅو سره ژوره مينه لري. خو د لارو کوڅو د سيل له پيل نه لږه موده وروسته يې پيدا کړه چې ځينې کوڅې څو نومونه لری او په عکسونو کې ددوي اړېکې نشی څرګندېږي . نو پريکړه يې بيا وکړه چې د لارو کوڅو په اړه يوه نقشه جوړوي. ښاغلي شو وويل، چې پنځه ګامونه تقريبأ درې متره اوږد دی، نو هغه د ګامونو په پورته کولو سره د هرې کوڅې اوږدوالی حسابوي. په تېرو شلو کلونو کې شو لياو هيڅکله دغه عمل ځنډ نه کړ. اوس مهال د سپين ږيری شو په کور کې ډېرې کتابچې ليدل کېږي چې اړوندې مفصلې شمېرنې او معلومات پکې ليکل شوي او دده کارنامې هم ترې انځورېږي . څرنګه چې ښاغلي شو د تاريخ او کولتور په څيړنه کې تجربه کار دی ، نو د لارو کوڅو د سيل او څيړنې په ترڅ کې يې زياتې تاريخي کيسې هم واوريدې . ده وويل، 

يوه ورځ ما په يوه کوڅه کې ګامونه پورته کول، و مې ليدل چې د يو کور د دروازې باندې څلور کريکترونه ليکل شوي وو چې په اصل کې دلته يو معبد و . نو له يو ځايي اوسيدونکي څخه ددې معبد په اړه پوښتنه وکړه. رښتيا ده چې په دغه کور کې اوسېدونکی د چين د امپراطور چينګ لونګ د ٣٣م نسل لسمی دی او بيا يې د امپراطور چيانګ لونګ په اړه زيات معلومات راته کړل.

تر ٢٠٠٢ کال پورې سپين ږيري شو لياو په بېجينګ کې نژدې ټولې لارې کوڅې ولېدلې چې د بيجينګ د لارو کوڅو د نقشې په جوړولو يې پيل وکړ. تردې وروسته په اتو کلونو کې يې هره ورځ په کور کې د نقشې په جوړولو بوخت و. که څه هم د سختو کارونو له امله يې د سترګو دېد ډېر ضعيف شوی خو په اخر کې په ٢٠١١ کال کې خپل کارونه پای ته ورسېدل. سپين ږيري شو وويل، چې هغه په درويشتو کلونو کې د بېجينګ د لارو کوڅو مفصله نقشه جوړه کړې ده . دا د ده د کوششونو نتيجه ده او دده فخراو وياړ هم دی . سيلانيان کولی شی چې دده لخوا د جوړې شوې نقشې په ليدو سره د بيجينګ په ګوټ ګوټ کې د تنګو او کږو لارو کوڅو سيل وکړي او د بيجينګ ښار د اصلي اوسيدونکو ژوند احساس کړي .