( سی من باو ) د ميلاد نه دمخه په ٥ مه پيړۍ کښی يو باعقله سړی ؤ ٠ پاچا هغه د ولسوال په حيث د ( ايې ) سيمی ته وروليږه ٠ کله چه هغه د ( ايې ) سيمی ته ورسيد سمدستی يی د محلی سيمی نامتو لويان راغونډ کړل او له دوی څخه يی پوښتنه وکړه چه  ستاسو په نظر د محلی سيمی لويه ستونزه کومه ده ؟  لويانو ور ته وويل چه تر ټولو نه د خلکو لوی غم د سيند د رب النوع  واده کول دی  ٠ ځکه چه دغه کار  د محلی سيمی  خلکو ته  لا زيات او سخت مشکلات او غربت رسولی دی  ٠

اصلاُ د ( ايې ) سيمه  د ژيړ سيند په غاړه واقع وه ٠ په دی ځای کښی يو روايت و چه د ژيړ په سيند کښی يو رب النوع  اوسيده ٠ او که انسانان د سيند  رب النوع ته نجلی ور نه کړی ٠ هغه به په قهر سره  سيلاب جوړ کړی او د ښار ټول خلک به په سيلاب کښی ووژنی ٠ او د اوږدی مودی نه راهيسی به محلی حکومت اوجادوګرانو په چل او دوکی  سره   د رب النوع د واده کولو دپاره هلی ځلی کولی او په دی بهانه به له خلکو څخه اضافی ماليات اخستل  ترڅو يی په ځپل منځ کښی  په پټ  ډول  وويشی ٠

سپين ږيرو لويانو  ( سی من باو ) ته وويل چه هرکال په يوه ټاکلی وخت کښی به يوه سپين سری جادوګره  هر ځای ته تلله او د رب النوع دپاره به  يی  يوه ښکلی نجلۍ انتخابوله ٠ منتخبی  ښکلی نجلۍ ته به يې نوی او ښکلی کالی جوړ کړی او ښه خوراکونه به يی ورکول ٠ کله چه به د څه دپاسه لس ورځو نه وروسته  د رب النوع د واده کولو ورځ راورسيده ٠ اوسيدونکو خلکو به دغه نجلۍ ښه سينګاروله ،   بوريايی کټ به يی ور ته جوړاوه او نجلۍ به يی پر بوريايی کټ  باندی کيښنوله  ٠  بيا به يی بوريا د سيند په اوبو کښی خوشی کوله  ٠  بوريا به د اوبو د څپو سره سرم حرکت کاوه او  ورو ورو به نجلۍ د بوريا سره يو ځای د اوبو په تل کښی ډوبيدله ٠وروسته به جادوګرو  درانده مراسم جوړول او دا معنی به يی ورکوله چه دغه  نجلۍ د سيند د رب النوع له خوا خوښه شوه او ور سره يی واده وکړ ٠ ( سی من باو ) د دی کيسی د اوريدونه وروسته هيڅ و نه ويل او سپين ږيرو هم د نوی ولسوال څخه کومه  هيله  نه درلوده ٠

د رب النوع د واده کولو ورځ راغله  ٠ په دی ورځ کښی ( سی من باو ) له وختی نه د عسکروسره يو ځای  د سيند په غاړه ولاړ ؤ ٠ لږ وخت وروسته واکمن مامورين او بډايان او ور سره نوکران ټول راغلل او دغه ښکلی نجلۍ هم  د ٧٠ کالو په عمر له سپين سری جادوګری  سره  راغله ٠ ( سی من باو ) وويل چه د رب النوع ښځه دلته راوړه او زه به يی وګورم چه هغه ښکلی ده او که نه ٠ نو نجلۍ يی د ولسوال مخ ته راوړه  ٠ ( سی من باو ) ور ته يو څه وکتل او بيا يی وويل چه زما په نظر دغه نجلۍ ښکلی نه ده ،  هغه د رب النوع  ښځه نه شی کيدای ٠ بايد بله نجلی وټاکله شی  ٠ خو نن ورځ د رب النوع د واده ورځ ده ٠ نو لازمه  ده چه سپين سری جادوګره سيند ته لاړه شی او زما دغه خبری رب النوع ته ووايی او بيا په بله ورځ بيرته راشی  ٠ د خبرو نه وروسته  عسکرو دغه سپين سری جادوګره سيند ته وغورځوله ٠ يوه شيبه تيره شوه ، خو له سيند څخه کوم عکسالعمل راپورته نه شو  ٠ نو ( سن من باو ) بيا وويل چه ولی سپين سری تر اوسه  بيرته رانه غله ؟  بايد ددی شاګرد سيند ته واستوی٠ نو دده په امر د جادو ګری شاګرد سيند ته وغورځول شو ٠ او په دی توګه هغه په وار سره د جادو ګری ٣ شاګران  سيند ته وغورځول  ٠

 بډايان او واکمن ماموران او د شاو خوا خلک ددی حالت په ليدو سره ډير حيران شول ٠ دوی وليدل چه ( سی من باو ) په جدی توګه دسيند په غاړه د رب النوع ځواب ته په انتظار کښی ولاړ دی ٠ بيا  يوه شيبه وروسته ( سی من باو ) وويل چه اوس زه پوه شوم چه  رب النوع  ډيرښه ميلمه پالونکی دی او ټول  دغه استازی يی له ځان سره ساتلی دی  ٠ نو بايد يو بل څوک وروليږم ٠ نو  هغو کسانو ته يی وکتل چه دوی د رب النوع د واده کولو په کار کښی ډيره  زياته علاقه ښودله ٠ دغه کسان په سخته ويره کښی ولويئدل ٠  نو وار په واره يی له ( سی من باو ) نه  د خپلی ګناه  بخښنه وغوښتله ٠ ( سی من باو ) په لوړ اواز ټولو خلکو ته وويل چه دا يوه دوکه  ده ٠ که وروسته څوک بيا دغه دوکه  وکړی ، نو هغه به په سيند کښی واچول شی ٠ وروسته د ( ايې ) په سيمه کښی د رب النوع د ښځه کولو په باب دوکه   بيا رامنځ ته نه شوه  او ( سی من باو ) د خپل عقل او هوښيارۍ سره سم په دی سيمه کښی کارونه  ښه ترسره کړل ٠