د چين د بين المللی راډيو د خبر له مخی، د افغانستان جمهوررئيس حامد کرزی د سپتمبر په شپږمه نيټه د يوه عربی تلويزونی سټيشن له خبريالانو سره د مرکې په بهير کښی له طالبانو او د حکومت په ضد له نورو وسله والو سازمانونو څخه غوښتنه وکړه چه بايد وسلې تسليم کړی او د افغانستان له خلکو سره يو ځای د هيواد په بيا أبادۍ کښی برخه واخلی ٠

جمهوررئيس حامد کرزی وويل چه که طالبان او نور وسله وال سازمانونه وغواړی چه ټولنې ته بيرته راشی، دوی ته به وبښل شی ٠ هغه له دوی څخه غوښتنه وکړه چه د هيواد راتلونکی ګټې په نظر کښی ونيسی او له ټولو خلکو سره يو ځای په فعاله توګه د خپل هيواد د بيا أبادۍ په بهير کښی ګډون وکړی٠