د سين هوا اژانس د خبر له مخی، د پاکستان د خبری رسنيو د خبر له مخی، پاکستان او هند به د راتلونکی مارچ په ديارلسمه او څوارلسمه نېټه په اسلام اباد کی د نوی دوری په سوله ايزو خبرو اترو پيل وکړي.
د جنوری په څوارلسمه نېټه له پاکستان څخه د هند د بهرنيو چارو وزير پراناب موکرجی دوه ورځنی ليدنه پای ته ورسيده. د ليدنې په ترڅ کی مکرجی او د پاکستان د بهرنيو چارو وزير خورشيد محمود قصوري خبريالانو ته دغه پرېکړه اعلان کړه.
مکرجی وويل دی د کشمير مسئلې د حل و فصل لپاره مهالوېش نه شی ټاکلی. خو هند به پر هر وړانديز غور وکړي. د دغې ليدنې په ترڅ کی مکرجی څو څو ځله هيله څرګنده کړه چی په سوله ايزه توګه له پاکستان سره خپلې ستونزې ليری کړي او ښه ګاونډيتوب ټينګ کړي.
د يو بل خبر له مخی،د مکرجی د دغې ليدنې يوه مهمه موخه دا وه چی د پاکستان ولسمشر ته بلنه يی ورکړه چی د راتلونکی اپريل په دريمه او څلورمه نېټه په نوی ډيلی کی د جنوبی اسيا د سيمه ايزی همکارۍ د ټولنې په سرمشريزه غونډه کی ګډون وکړي. د پاکستان د بهرنيو چارو وزير به د مکرجی د بلنې په منلو سره په راتلونکی فبروری کی په نوی ډيلی کی د ګډې کميټې په غونډه کی ګډون وکړي. پر دې سربيره دواړو خواوو پرېکړه وکړه چی د راتلونکی مارچ تر پايه پوری د ترهګرۍ پر ضد د پاکستان او هند د ګډې کړنلارې لومړی غونډه جوړه کړي.
