د سين هوا اژانس د خبر له مخې، د اروپايی ټولنې د اوه ويشتو غړيو هېوادونو د دفاع وزيرانو د مارچ په لومړی نېټه د المان په ويسبادن ښار کې يوه نارسمی غونډه تر سره کړه او د افغانستان د پوليسو د روزنې په اړه موافقې ته ورسيدل او پرېکړه يی وکړه چې د روزنې د سلاکارانو شمېر له اوسني شمېر څلويښت تنو څخه يو سل او شپېتو تنو ته زيات کړي.
د المان د خبری اژانس د خبر له مخې، د اروپايی ټولنې د نوبتی رئيسه هېواد د المان د دفاع وزير فرنز جوسيف جونګ وويل د اروپايی ټولنې موخه د شپېتو زرو تنو افغان پوليسو ښه روزنه ده. ده زياته کړه چې تر اوسه پوری يو زر او اوه سوه تنه افغان پوليس روزل شوي دي.
د ناتو سرمنشی جاپ دی هوپ شيفر چې دغې غونډې ته د ګډون لپاره بلل شوی و، له افغانستان سره د اروپايی ټولنې د زياتو مرستو ستاينه وکړه. هغه دغه خبره رد کړه چې امريکا پر خپلو ملګرو فشار راوړی او له دوی څخه يی غوښتنه وکړه چې د افغانستان جنوبی سيمو ته خپل سرتيري وليږي.
