د سين هوا اژانس د خبر له مخې، د لتويا حکومت د نومبر په ديارلسمه نېټه له ٢٠٠٧ کال څخه تر ٢٠١٣ کال پوری د افغانستان په بيا رغونه کې د دغه هېواد د ګډون د عملياتو په هکله يوه بنسټيزه قاعده تصويب کړې چې له مخې به يې افغانستان ته زياتې مرستې ورکړي.
د دغې قاعدې له مخې به په راتلونکيو څو کلونو کې د لتويا پوځ په افغانستان کې د ناتو د امنيت مرستندويه نړيوالو ځواکونو په عملياتو کې ګډون وکړي. ٢٠٠٨ کال به لتويا په افغانستان کې د خپلو سرتيريو شمېر له يو سل او پنځوسو څخه دوه سوو تنو ته زيات کړي او افغانستان ته به د دری مليون او يو لک امريکايی ډالرو په ارزښت وسلې برابرې کړي. د لتويا د دفاع وزرات په أند لازمه ده چې په نورو برخو کې هم بايد له افغانستان سره مادی او تخنيکی مرستې او د افغانستان د بيا رغونې صندوق ته زياتې پيسې برابرې شي.
