د چين نړيوالې راډيو د خبر له مخې: د استراليا صدراعظم کيوين رود چې اوس له بلژيک څخه په خپله رسمي ليدنه بوخت دی د اپريل په دوهمه نېټه په بروکسل کې څرګنده کړه چې استراليا به له افغانستان څخه خپل ځواکونه ونه باسي او دغه ځواکونه به د اوږدې مودې لپاره په دغه هېواد کې پاتې شي.
صدراعظم کيوين رود په همدې ورځ د اروپايی ټولنې کميټې له مشر جوس مانويل بارو سره له خبرو اترو وروسته خبريالانو ته وويل استراليا به افغانستان ته نور سرتيري ونه لېږي. هغه له افغانستان څخه د اپيونو توليد په مخنيوی کې د زيار ايستلو غوښتنه وکړه چې له مخې يې پر ترهګرانو د پيسو راغونډولو لار بنده کړي.
اوس مهال د افغانستان په اروزګان ولايت کې څه باندی زر تنه استراليايي سرتيري ميشت دي چې د خپل ماموريت په ترڅ کې يې تر اوسه دری تنه سرتيري وژل شوي دي.
