د چين د نړيوالې راډيو د خبر له مخې د چين صدراعظم ون جيا باو د جون په دېرشمه نېټه په بېجينګ کې د امريکا د بهرنيو چارو له وزيرې کوندوليزا رائيس سره د کتنې په ترڅ کې وويل چين غواړي له امريکا سره يو ځای د خبرو اترو او سلامشورې له لارې يو بل ته پاملرنه وکړي چې د دواړو هېوادونو ترمنځ ګډې ګټې لا پياوړې شي.
صدراعظم ون جيا باو تر هرڅه لومړی د چين له زلزله ځپلو سيمو سره د امريکا د حکومت او بېلا بېلو خواوو له مرستو مننه څرګنده کړه. هغه وويل چې په تېرو څو کلونو کې د چين او امريکا ترمنځ اړيکو مهم پرمختګ موندلی دی. د دواړو هېوادونو ترمنځ د ښو اړيکيو ټينګتيا او ژورتيا د دواړو خواوو ګډه دنده ده. صدراعظم ون جيا باو د چين او امريکا ترمنځ د څلورمی دورې ستراتيژيکو اقتصادي خبرو اترو لوړه ستاينه وکړه.
وزيرې رائيس د زلزله ځپلو سيمو د ژغورنې په بهير کې د چين د حکومت او خلکو له خوا د تر لاسه شويو برياليتوبونو لوړه ستاينه وکړه او ويی ويل چې امريکا غواړي په پر له پسی توګه د چين د زلزله ځپلو سيمو له بيا رغونې څخه ملاتړ وکړي.
