د بېجينګ د اولمپيک لوبو په اړه نړيوالې نظريې
د يو شمېر هېوادونو خبري رسنيو په وروستيو ورځو کې په جلا جلا توګه د بېجينګ په اولمپيک لوبو کې د چيني لوبغاړيو لخوا د تر لاسه شويو برياليتوبونو او د چينی وګړيو د شوق او زوق ډېره ستاينه وکړه.
د جنوبی افريقا مشهورې کاپی ټايمز ورځپاڼې د اګست په ديارلسمه نېټه تر دې عنوان لاندی په لومړي مخ کې وليکل چې د چين لوبغاړيو برياليتوبونو نړۍ ولړزوله . د دغه هېواد د راډيو او تلويزيون شرکت په همدې ورځ د جمناستيک په لوبو کې د چين د ښځينه لوبغاړيو لخوا د تر لاسه شوي ډله ايز طلايی مډال په اړه وويل تر هغه وروسته چې د روانې مياشتې په دوولسمه نېټه د چين نارينه وو لوبغاړيو هم په ډله ايزو سياليو کې د سرو زرو مډال ګټلی ، د چين ښځينه لوبغاړيو هم دغه مډال وګاټه. دا افسانه نه ده ، بلکې يو ريښتينی حقيقت دی.
د ايکيپی په نامه ورځپاڼې چې د فرانسې يوه اغيزمنه سپورتي ورځپاڼه ده ، د اګست په ديارلسمه نېټه د يوې ليکنې په خپرولو سره وويل چينی نندارچيانو د بېجينګ اولمپيک لوبو د سياليو کتلو په ترڅ کې ښه کيفيت څرګند کړی دی. د جمناستيک په سياليو کې چينی نندارچيانو د هر هېواد لوبغاړيو ته تودې چک چکې وکړې او د دوی د برياليتوب په هکله يې افرين ووايه.
د فليپين د مانيلا ټايمز په نامه ورځپاڼې د اګست په څوارلسمه نېټه په يوه مقاله کې وويل په وروستيو ورځو کې د اولمپيک لوبو په اړه سياسي نظريې ډېرې کمې شوې، دا د اولمپيک لوبو له روحيې سره سمون خوري. د چيني او امريکايي لوبغاړيو تر منځ د مډالونو په تيره بيا د سرو زرو مډالونو د ګټلو سيالی د پاملرنې وړ ده. سپورت او دوستی د اولمپيک لوبو د تر سره کولو بنسټ بلل کېږي.
پر دې سربيره، دغې ورځپاڼې د اګست په پنځلسمه نېټه يوه بله مقاله خپره کړه چې عنوان يې و _ د چين د سوداګريزو شيانو مارکونه د پرمختګ نوی پړاو ته رسيدلي دي. په مقاله کې ليکل شوي که څه هم چينی توليدات په نړۍ کې ښه بازارونه لری، خو ډېر مارکونه يې مشهور نه دي، نو د بېجينګ اولمپيک لوبو د دغو مارکونو د شهرت موندلو لپاره يو ښه فرصت برابر کړی دی.
په مقاله کې دې ته اشاره شوي چې د لينوو په نامه د چين د کمپيوتر توليدولو شرکت لومړی چينی شرکت دی چې د پنځه شپېته مليون امريکايی ډالرو په برابرولو سره د اولمپيک د نړيوالې کمېټې لخوا د نړيوال همکار شرکت په توګه ومنل شو چې له مخې يې په نړۍ کې د دغه شرکت شهرت د پراخوالی لپاره ډېر ګټور دی. په همدی وخت کې د لي نينګ په نامه د سپورتي کاليو توليدی شرکت د پينګ پانګ، ډايف کولو ، جمناستيک او نښې ويشتلو په برخو کې له چينی لوبډلو سره مرستې کوی. د هسپانيا، سويدن او ارجنتاين په شمول د زياتو هېوادونو د باسګټبال لوبډلو او د امريکا د پينګ پانګ لوبډلې په ګډون لوبغاړي د لي نينګ مارک جامې اغوندي چې د نړۍ ډېر پام يې راجلب کړی دی. د دغه شرکت جوړونکی يعنی
د چين پخواني مشهور لوبغاړی لي نينګ له دې امله چې د بېجينګ د اولمپيک لوبو په پرانيستونکو مراسمو کې سپيڅلی مشال يې بل کړ ، د ټولې نړۍ نندارچيانو ته ژوره خاطره پرې ايښې ده.
په دغه مقاله کې زياته شوی چې ٢٠٠٨ کال د چين د اصلاحاتو او ورخلاصون تګلارې د پلی کولو له دېرشمې کليزې سره برابر دی او د بېجينګ اولمپيک لوبې ښايی په نړيواله ساحه کې د چين او چينی توليداتو د ننوتلو يو مهم ټکی وګرځي.
د سينګاپور د ليانګ هه جاو باو ورځپاڼې د اګست په څوارلسمه نېټه په يوه مقاله کې وويل چې د دغه هېواد ولسمشر ناتان د بېجينګ له اولمپيک کلی څخه تر ليدنې وروسته په دغه کلی کې موجود تاسيسات ډير وستايل او و يې ويل د بېجينګ اولمپيک کلی د بېلا بېلو هېوادونو او کارکوونکيو ته د استوګنې ډېر ښه تجهيزات برابر کړی چې لوبغاړي ارام ژوند کوی او په ښه توګه خپلې سيالۍ تر سره کوی.
