د مالوماتو له مخې، د جاپان د توکيو برېښنا شرکت د ډسمبر په ۲۱مه نېټه د دغه هېواد اټومي کميټې ته سمندر ته د فوکوشيما برېښناکوټ ذروي ککړو اوبو د خوشي کولو پلان وړاندې کړی دی. د چين د بهرنيو چارو وزارت ویاند جاو لي جيانګ د روانې مياشتې په ۲۲مه نېټه په يوه نوبتي مطبوعاتي غونډه کې د جاپان د دغې کړنې په اړه وويل، چې چين سمندر ته د ذروي ککړو اوبو د خوشي کولو په اړه د جاپان له يو اړخيزې پرېکړې سره ټينګ مخالفت کوي.

نوموړي پر دې ټينګار کړی، چې د فوکوشيما د ذروي ککړو اوبو خوشي کول د سمندر له ايکولوژيکي چاپيريال او د خلکو له روغتيا سره نژدې اړيکې لري او دا د جاپان کورنۍ چارې نه دي. جاپان بايد د ګاونډيو هېوادونو په ګډون د نړيوالې ټولنې اندېښنې په پام کې ونيسي او خپله ناسمه پرېکړه دې لغوه کړي. جاپان حق نه لري، چې د نړيوالې ټولنې له منظورۍ پرته سمندر ته ذروي ککړې اوبه خوشې کړي. (شکريه)