د امريکا د بهرنيو چارو وزير انتوني بلينکن د نومبر په ۱۲مه نېټه اعلان کړ، چې قطر به په افغانستان کې د امریکا د ګټو نماینده وګرځي.
بلينکن په همدې ورځ د قطر د بهرنيو چارو له وزير محمد بن عبدالرحمن الثاني سره وکتل او وروسته يې په خبري ناسته کې ياده پرېکړه اعلان کړه.
د دواړو خواوو د تړون له مخې به ، قطر په افغانستان کې د امريکا استازی هېواد وګرځي، په افغانستان کې به د قطر سفارت يوه څانګه جوړه کړي، چې د امریکا سفارت د کونسولۍ خدمتونه به برابر کړي او په دغه هېواد کې به د امريکا د ديپلوماتيکو تأسيساتو امنيت وساتي.