د چين په مټ د لاوس د پرمختګ خوب رښتيا شوی دی
که دغه رېل پټلۍ نه وای جوړه شوې، زما به هغه خيال نه وای رښتیا شوای، چې له لاوس څخه نورو هېوادونو ته سفر وکړم . اوس زه غواړم چې سمدلاسه د رېل پټلۍ په وسيله خپل سفر پيل کړم. د لاوس اوسېدونکي کانسو چې د چين او لاوس تر منځ د ريل پټلۍ په پروژه کې يې د ژباړونکي په توګه کار کاوه، ياده څرګنده وکړه.
د بېجينګ پر وخت د ډسمبر د درېيمې نېټې د مازديګر په څلورو بجو او ۴۴ دقيقو د چين او لاوس مشرانو په انلاين ډول د يادې رېل پټلۍ د پرانيستلو فرمان ورکړ، چې له دې کبله د کانسو په شان ډېر لاوسيان له خپل هېواد څخه بهر ته تللی شي. د چين د دولت رئيس شي جين پينګ په همدې ورځ د لاوس له مشر تونګ لون سره په ويډيويي غونډه کې ويلي ،چې له نورو هېوادونو سره د لاوس د تړلو خوب به ژر رښتيا شي.
د چين او لاوس ترمنځ د رېل پټلۍ پروژه د يو کمربند او يوې لارې د وړانديز په رڼا کې لاوس ته د چين له خوا ور کړل شوې قيمتي تحفه ګڼل کيږي. له دې نه مخکې د لاوس په دننه کې يوازينۍ رېل پټلۍ شتون درلود ،چې له دغه هېواد څخه تر تايلنډ پورې غځېدلې و او اوږدوالی يې درې اعشاريه پنځه کيلو متره دی. د چين او لاوس ترمنځ ريل پټلۍ چې د جوړونې کارونو يې له پنځو کلونو راهیسې دوام درلود او اوږدوالی يې ۱۰۳۵ کيلو متره دی٬ ګټې اخيستنې ته سپارل شوې چې له دې کبله د دغه هېواد له پلازمېنې څخه له چين سره سرحداتو ته د سفر وخت له دوو ورځو څخه درېیو ساعتونو ته کم شوی او لاوس د ګړندي اورګاډي زمانې ته هم داخل شوی دی.
په چین کې دا خبره شته، چې که غواړئ شتمن شئ ٬نو باید یوه ښه لاره هواره کړئ .د یادې رېل پټلۍ پرانيستل د ځايي وګړو د ژوند ښه والي او د اقتصادي پرمختګ لپاره ډېر مهم اهمیت لري. د لاوس د دولت رئيس تونګ لون د ډسمبر په دوهمه نېټه د دې هېواد د ملي جشن په مناسبت د مبارکۍ په پيغام کې ويلي، چې د چين او لاوس ترمنځ رېل پټلۍ به د لاوس جغرافيایي غوره والي د ښودلو په برخه کې مهم رول ولوبوي او پرمختيايي هېوادونو ته د دغه هېواد د داخلېدو لپاره به زمينه برابره کړي.
د دې ترڅنګ د دغې رېل پټلۍ په واسطه به پرمختيايي فرصتونه هم برابر شي. خلکو ته پر اسانتياوو برابرولو سربېره دغه ريل پټلۍ به د دې لارې په اوږدو کې د پرتو سيمو د ګرځندوی، کرنې ٬د اوبو لګولو ٬ د دې هېواد د ښاري کېدو او د نورو اقتصادي سيمو د پرمختګ په برخو کې ډېر مهم رول ولوبوي.
د لويې اسيا د ريل پټلۍ د يوې مهمې برخې په توګه د چين او لاوس ترمنځ د رېل پټلۍ تر جوړېدو وروسته لاوس کولی شي، چې شمال يې له چین سره او جنوب يې له تايلنډ او ماليزيا سره وتړي او په دې توګه د چين او اسيان د ازادې سوداګرۍ سیمې پرمختګ او د ميکونګ سيند پر غاړه د پرتو سيمو اقتصادي همکارۍ ته وده ورکړي. د بېلګې په توګه د يادې رېل پټلۍ تر پرانيستلو وروسته به د لاوس پلازمينې له وينتيان څخه د چين تر کون مينګ پورې د مالونو د لېږد رالېږد لګښت څلوېښت او يا پنځوس سلنه راټيټشي. د لاوس د ملي کانګرس مرستيال رئيس سوماد پولسينا ويلي، چې د چين او لاوس ترمنځ ريل پټلۍ د دواړو خواوو ترمنځ د همکاریو او د چارو د جوړولو لپاره يوه ښه لاره بلل کيږي. د دې ترڅنګ دغه لار د راتلونکي پرمختګ لپاره ګټوره ده.
سربېره پردې د ډېرو وګړو په اند، دغه لاره هم له هيلو څخه ډکه ده. په ۲۰۱۶ کال کې د یادې رېل پټلۍ د پروژې له پيل راهيسې څه باندې پنځه زره ځايی وګړو په دې بهير کې ګډون کړی او ډېر لاوسي ځوانان له خپلو سيمو څخه بهر ته تللي او عصري تخنيکونه او پوهنه يې خپله کړې ده.
مونږ باور لرو ،چې د یو کمربند او يوې لارې د وړانديز په پلي کېدو سره به چين هرو مرو هغه موخه تر لاسه کوي، چې له نورو هېوادونو سره ګډ پرمختګ ومومي او زیات خلک لا نېکمرغه ژوند وکړي.