امريکا د ۲۰۲۱م کال په اګست کې له افغانستان څخه خپل پوځ ايستلی، چې په ترڅ کې يې د ګډوډۍ حالت ټولې نړۍ ته ښودلی دی. له دې نه وروسته د امريکا سپينې ماڼۍ، دفاع وزارت او د استخباراتو ادارې يو پر بل نيوکې کړي او له افغانستان څخه د امريکايي پوځ د بې وخته وتلو پړه یې پر یو بل اچولې ده.. د امريکا پنټاګون تېره اونۍ يو راپور خپور کړ، چې يو ځل بيا یې د ګډوډۍ د لامل په اړه سپينې ماڼۍ ته اشاره کړې ده.
د روسيې د RTخبري اژانس د خبر له مخې، د امريکا د واشنګټن پوست ورځپاڼې په روانې اونۍ کې د امريکا د دفاع وزارت لخوا له افغانستان څخه د امريکايي پوځ د وتلو په اړه مشخص راپور تر لاسه کړ. په دغه راپور کې، چې دوه زره پاڼې لري، ليکل شوي، چې له افغانستان څخه د وتلو اړوند پوځي مسئولينو د امريکا پر حکومت نيوکه وکړه، چې په پر له پسي ډول يې د وتلو په فعاليتونو کې لاسوهنه کړې او د دوی پر پاملرنې يې بدې اغيزې کړي، نو دوی ونشوای کولای، چې په بېړه کارونه بشپړ کړي.
له افغانستان څخه د امريکايي پوځ د وتلو په درشل کې په کابل کې د امريکا د سمندري پوځ بريد جنرال پيټر واسيلي وويل، چې په سپيڼې ماڼۍ کې نسبت نسبتاً هره ورځ هر کس نوې غوښتنې وړاندې کوي. نه يوازې د امريکا ولسمشر جو بايډن او د ده مېرمن، بلکې د امريکا د پارلمان غړو او خبريالانو په شمول شخصيتونو پر دوی فشارونه اچولي، چې ژر خپل کسان بېرته امريکا ته ولېږي. له افغانستان څخه د امريکايي پوځ د وتلو په اوولس ورځنيو فعاليتونو کې د دغو فعاليتونو پوځي مسئولينو په زر ګونو زنګونه ، مسيجونه او بريښنايي ايميلونه تر لاسه کړي دي. نو دوی مجبور شول د همغږۍ ځانګړي ګروپونه جوړ کړي، چې دغه مسيجونو ته ځواب ووایي .
واسيلي په تکرار ډول پر دې ټينګار کړی، چې د امريکا د مشرتابه غوښتنې د مخابراتو له سرچينو په استفاده شوي ، چې په اصل کې ډېرې کمې وې. د ده په نظر په هغه وخت کې د ګډوډۍ حالت د دغو کسانو له مسلسلو غوښتنو او فرمانونو سره تړاو لري.
خو د امريکا د بايډن حکومت له افغانستان څخه د امريکايي پوځ د وتلو د ناکامېدو پړه د ټرمپ پر حکومت اچولې ده. بايډن په خپله وينا کې پر دې ټينګار کړی، چې هغه د ولسمشرۍ دندې د پيل کولو په وخت کې له پخواني ولسمشر ټرمپ څخه د امريکا او د طالبانو لخوا لاسليک شوی تړون واخيست.
د امريکا د خبري رسنيو په قول د امريکا د استخباراتو ادارې اړوندو مامورينو له افغانستان څخه د امريکايي پوځ د وتلو مخکې سپينې ماڼۍ او پانتاګون ته خبرداری ورکړ، چې د افغانستان حکومت ښايي ژر سقوط شي، خو دغه خبرداري ته هېڅ پاملرنه نه ده شوې. په افغانستان کې د مېشت امريکايي پوځ د قومندانۍ پخواني پوځي مشاور ميدګلي ويلي، چې موږ اورو ټول کسان یو پر بل پړه اچوي او یو پر بل نیوکه کوي.
د امريکا د پوځي چارو پوهانو د امريکا د بېلا بېلو خواوو د يادو کړنو په هکله ويلي، چې د امريکا حکومت او امريکايي پوځ بايد د افغانستان د مسئلې په اړه د تګلارو د ناکامۍ په ترڅ کې پر خپلو تېروتنو له سره فکر وکړي، خو اوس يوازې يو پر بل پړه اچوي او دا د شرم خبره ده.