د چين د بهرنیو چارو وزارت ویاند وانګ ون بین د فبرورۍ پر ۱۴ مه نېټه د دغه وزارت په مطبوعاتي کنفرانس کې د يوه خبريال پوښتنې ته په ځواب کې وويل، چې په بهر کې د افغانستان کنګلې پیسې په افغانانو پورې اړه لري او بايد افغانستان ته بېرته ورکړل شي تر څو د افغانانو د ښېګنې لپاره ولګول شي. د امريکا ولسمشر د یو فرمان له مخي په خپل سر دغه شتمني ضبط او وويشله او له دې څخه يوځل بيا د امريکا د بادارۍ او تسلط بڼه افشا شوې ده.
ښاغلي وانګ زیاته کړه، چې امريکا د افغانستان د اوسني بحران پاروونکې ده، چين له امريکا څخه غوښتي چې خپلې تېروتنې سمې کړي او خپل نړيوال مسئوليت دې پر غاړه واخلي، ژر دې د افغانستان کنګل شوی شتمني ازاده کړي، پر دغه هېواد بندیزونه دې لغوه کړي، په رښتنو اقداماتو سره دي افغانانو ته د اوښتو زیانونو جبران ورکړي او هغوی ته بايد نور زيانونه ونه رسوي.