د سينهوا اژانس د خبر له مخې، د روسيې د خبرو اترو د پلاوي استازي ليونيد سلوځکي د مارچ په ۹مه نېټه ويلي، چې له اوکراين سره د خبرو اترو موخه يې دا ده، چې له دغه هيواد سره په پوځي، سياسي او بشري مسئلو کې موافقې ته ورسیږي، خو له خپلو مادو او غوښتنو به تېر نشي.

د امريکا د دفاع وزارت وياند جان کربي په همدې ورځ ويلي، چې امريکا د پولنډ هغه پلان رد کړی، چې د دغه هېواد له لارې اوکراين ته ميګ -۲۹ ډول جنګي الوتکې وليږي.
امريکايي چارواکو د ناټو له غړو هېوادونو څخه اوکراين ته د جنګي الوتکو د مستقيم يا غير مستيقيم ليږد سره مخالفت کړی او په اوسنيو تاوجنو حالاتو کې اوکراين ته د جنګي الوتکو ليږل يې یوه ډېره خطرناکه کړنه بللې ده.

کربي ويلي، امريکا او ملګري هېوادونه به د جنګي الوتکو پر ځای اوکراين ته د هوايي بريد ضد سيستم برابر کړي.
(خبرياله: شکريه)