د هوا پيژندنې نړيوال سازمان د ۲۰۲۱م کال په اګېست کې د یوې نقشې ( له ۱۹۷۰م ـ ۲۰۱۹م کال پورې د هوا، اقليم او اوبو په سختو ناورينونو کې د مړينو شمېرې او اقتصادي زيانونه) په خپرولو سره څرګنده کړې وه، چې په یادې مودې کې په ګردې کرې کې څه باندې ۱۱۰۰۰ طبعيي ناورينونه رامنځته شوي او له امله يې د مړه شويو کسانو شمېر له ۲ ميليونو تنو څخه هم زيات او د اقتصادي زيانونو عمومي اندازه يې ۳۶۴۰ ميليارډو امريکايي ډالرو ته رسېدلې وه.
د هوا پيژندنې د نړيوال سازمان شمېرنې ښيي، چې په ټولې نړۍ کې له درېيو کسانو يو کس له اړوند سيستم څخه د اقليمي پېښو پيشبيني نه شي تر لاسه کولای، نو د مختلفو هېوادونو د هوا او اوبو پيژندنې د ادارو، د ناورينونو د اداري څانګو او د پرمختيايي ارګانونو ترمنځ د همکاريو پياوړتيا به د ناورينونو د پيشبينۍ او مخنيوي او له مصيبت ځپلو سيمو او خلکو سره د مرستې لپاره ګټوره وي.
په ټولې نړۍ کې د کرونا وبا د پر له پسې خپرېدو له امله اوس بېلا بېل هېوادونه له ډېرو سختو ننګونو سره مخامخ دي، نو خلک بايد د ډول ډول ناورينونو د پيشبينۍ، د اقليمي بدلون د مخنيوي او دوامدار پرمختګ په برخو کې مؤثر تدبيرونه ونيسي.
د هر کال د مارچ ۲۳مه نېټه د هوا پيژندنې له نړيوالې ورځې سره برابره ده.
د روان کال د دغې ورځې مطلب ( وختي پيشبيني او مخکښ عمل) دی.
د هوا پيژندنې نړيوال سازمان سرمنشي پيټري ټالاس په همدې ورځ د سي ايم جي له خبريالې سره د مرکې په ترڅ کې ويلي، چې د نړۍ ګڼې سيمې د اقليمي بدلون تر منفې اغيزې لاندې راغلي او د هوا، اقليم او اوبو پېښې او ناورينونه پکې د سختېدو په حال کې دي.
د هوا پيژندنې نړيوال سازمان د ملګرو ملتونو د هوا، اقليم او اوبو د رسمي ارګان په توګه ۱۹۳ غړي لري او له لويو دندو څخه يې يوه دا ده، چې خپلو غړو ته د هوا، اقليم او اوبو د څار معلومات او پيشبيني ورکوي، خو اوس د دغه سازمان له غړو څخه يوازې نيمه برخه يې د څو ډولو طبعيي ناورينونو د پيشبينۍ سيستم لري.
د معلوماتو له مخې، په دغه سازمان کې د چين رسمي څوکي په ۱۹۷۲م کال کې بيا اعاده شوې ده.
ښاغلي پيټري ټالاس په مرکې کې ويلي، چې چين د دغه سازمان د مهم غړي په توګه په ټولې نړۍ کې د دغه سازمان د خدمتي سيستم د بشپړتيا لپاره له ۵۰ کلونو راهيسې ستر رول لوبوي. چين د اقليمي بدلون او د سختو طبعيي ناورينونو د مخنيوي، د هوا پيژندنې د سيمه ييزو، څواړخيزو او دوه اړخيزو همکاريو د پياوړتيا، د هوا پيژندنې د تعليم او ښوونې او له وروسته پاتې هېوادونو سره د مرستې په برخو کې ډېر خدمتونه کړي او د لېدو وړ برياليتوبونه يې تر لاسه کړي او اوس د هوا پيژندنې د توان د لوړتيا او د پرمختګ د پياوړتيا خوځنده ځواک ګرځېدلی دی.
ښاغلي پيټري ټالاس زياته کړې، چې هغه په ۲۰۱۹م کال کې د ( يو کمربند او يوه لاره) په تړاو د نړيوالو همکاريو په لومړي عالي رتبه فورم کې ګډون کړی و او په ترڅ کې يې د چين د هوا پيژندنې له ملي رياست سره یو تړون (د چين د هوا پيژندنې ملي رياست او د هوا پيژندنې نړيوال سازمان ترمنځ د سيمه ييزو اقليمي همکاريو د پياوړتيا او د يو کمربند او يوې لارې د ګډې ابادۍ د ادارې ليک) لاسليک کړی دی.
دا تړون به په راتلونکې کې د نړيوال اقتصاد او ټولنې د پر له پسې پرمختګ د پياوړتيا لپاره د دواړو خواوو ترمنځ همکارۍ ژورې کړي.
نوموړي زياته کړې، چې د هوا، اقليم او اوبو د ناورينونو پيشبيني د کرنيزو توليداتو د زياتوالي، د عامه امنيت د ساتنې او د سر او مال د زيانونو د کمښت لپاره مهم رول لوبوي. که اړوند هېوادونه او سيمه مخکې له مخکې پيشبيني تر لاسه کړي، نو په ځمکني، سمندري او هوايي ټرانسپورټي چارو کې به اړوند زيانونه کم شي او دا چاره د نړۍ د ټولو هېوادونو او خلکو د ګټو د ساتلو لپاره ډېره ګټوره ده.