د جنوبي سوډان په ځينو سيمو
کې کشالو او تاوتريخوالي زور اخیستی او امنيتي حالات يې پېچلي شوي دي.
د چين د
بهرنيو چارو وزارت وياند وانګ ون بين د مارچ په ۳۰مه نېټه په يوه نوبتي مطبوعاتي
غونډه کې د جنوبي سوډان د شخړو پر ښکېلو خواوو غږ کړی، چې د سولې لپاره هلې ځلې
وکړي او د اوسنيو حالاتو د سختېدو مخه دې ونيسي.
نوموړي وويل، چې له ۲۰۲۰م کال
راهيسې، د جنوبي سوډان په سوله ييز بهير کې مهم برياليتوبونه رامنځته شوي، چې دا نه
يوازې د دغه هېواد د خلکو له اصلي ګټو سره سمون لري، بلکې د سيمې سولې او ثبات
لپاره هم ګټور دي.
وانګ ون بين د جنوبي سوډان پر ټولو خواوو غږ کړی، چې یاد
برياليتونه وساتي او د هيواد ښېرازۍ لپاره دې لاس په کار شي.
چين د جنوبي سوډان
د شخړې له ښکېلو خواوو غوښتي، چې د هېواد او خلکو ګټو ته لومړيتوب ورکړي، تر وسې
پورې دې سړه سينه وساتي، خبرو اترو او سلا مشورو ته دې ادامه ورکړي او د اوسنۍ
کشالې د لا سختېدو مخه دې ونيسي.
وانګ ون بين وويل، چې چين به له نړيوالې ټولنې
سره يو ځای د جنوبي سوډان د سياسي انتقال بهير د پرمخبيولو لپاره خپلو هڅو ته دوام
ورکړي او په دې برخه کې به مثبت رول ولوبوي.
(خبرياله: شکريه)