د سين هوا اژانس د خبر له مخې، د اروپايي شورا رئيس چارلیز میشل د اپریل په ۲۰مه نېټه اوکراین ته تللی او د دغه هېواد له ولسمشر ولاديمير زلینسکي سره يې ليدلي دي.
دوی دواړو د اروپايي ټولنې د کاندید په توګه د اوکراین غوښتنې، پر روسیې د بندیزونو شپږم پړاو او د ماریوپول وضعیت او د اوکراین بیارغونې په شمول د ځینو موضوعاتو په هکله بحثونه کړي دي.
ولاديمير زلینسکي او چارليز ميشل له ليدنې وروسته په یوې خبري ناستې کې راڅرګند شوي او د خبريالانو پوښتنو ته يې ځوابونه ويلي دي.
زلینسکي ويلي، چې اوکراین اروپايي ټولنې ته د سروې ځيني ځوابونه ورکړي او هیله يې ښودلې، چې اروپايي ټولنه د اوکراین د غړيتوب په اړه غونډه او رایګیري ترسره کړي.
میشل ویلي، چې اروپايي ټولنه پلان لري، په راتلونکې جون کې د اوکراین د کانديد په اړه پرېکړه وکړي. (هیله)