نن، يعنې د اکتوبر لومړۍ نېټه د چين له ملي جشن سره برابره ده. دغه جشن د ۱۹۴۹م کال د اکتوبر په لومړۍ نېټه د چين ولسي جمهوريت د جوړېدو په مناسبت د لمانځنې لپاره ټاکل شوی او چينايان هر کال دغه جشن لمانځي.
د روان کال ملي جشن د چينايانو لپاره ځانګړی ارزښت لري، ځکه د دغه جشن د ۷ ورځنۍ رخصتۍ له پای ته رسېدو وروسته به د چين د واکمن ګوند، يعنې د چين د کمونېست ګوند شلم ملي کانګرېس پيل شي.
ولې چينايان دغې غونډې ته سترګې په لار دي؟ دغه غونډه به د چينايانو د دوهمې سل کلنې موخې د پوره کېدو لپاره ستراتيژيک ترتيبات او مهم تدبيرونه وړاندې کړي. د چينايانو لومړۍ سل کلنۍ موخه تېر کال پوره شوه، چې له مخې يې د چين کمونېست ګوند د جوړېدو سلمه کليزه او دغه راز په ۲۰۲۱م کال کې په چين کې هراړخيزه شتمنه ټولنه جوړه شوې ده. د چينايانو دوهمه سل کلنۍ موخه دا ده، چې د چين ولسي جمهوريت د جوړېدو په سلمې کليزې يعنې د روانې پېړۍ په نيمايي کې دغه هېواد د يوه اباد، ډيموکراتيک، مدني، همغږي او ښکلي سوسياليستي عصري هېواد په توګه جوړ شي. دغه هېواد به د يادې موخې د پوره کولو لپاره کوم مشخص پلانونه او مهم تدبيرونه غوره کړي او د دې موخې پوره کېدل به خلکو ته کومې ګټې ورسوي؟
مختلف هېوادونه د عصري کېدو لپاره خپلې ځانګړتياوې لري. د چين د عصري کېدو لار نه يوازې چينايانو، بلکې نړيوالو ته هم ګټې رسولی شي.
د چين د عصري کېدو لار د نړۍ د بېوزلۍ د له منځه وړلو لپاره ګټوره ده. په تېرو څلوېښتو کلونو کې په چين کې نژدې ۸۰۰ ميليونه بېوزله وګړي، چې د مطلقې بېوزلۍ د نړيوال معيار له مخې پېژندل شوي، له غريبۍ څخه ژغورل شوي دي، چې دا رقم په همدې موده کې په نړۍ کې له بېوزلۍ څخه د وتلو کسانو ۷۵ سلنه جوړوي.
د چين د عصري کېدو لار د غلو دانو د نړيوال بحران د کمولو لپاره ګټوره ده. چين په نړۍ کې د غلو دانو لومړی لوی توليدوونکی هېواد دی. د دغه هېواد د کرهنيزو ځمکو مساحت د نړۍ د کرهنيزو ځمکو د عمومي مساحت له ۹ سلنې کم دی، خو د نړۍ نژدې ۲۵ سلنه حبوبات يې توليد کړي او د نړۍ د نژدې ۲۰ سلنه نفوس لپاره یې خوراکي مواد برابر کړي. د دې ترڅنګ، چين د نړيوالو غلو دانو د خونديتوب لپاره ډېرې هڅې کړي، چې د نړيوالو غلو دانو د خونديتوب او همکارۍ پېشنهاد يې وړاندې کړی، له نورو هېوادونو سره يې د بشر دوستۍ مرستې کړي او نورو پرمختيايي هېوادونو ته يې کرهنيز تخنيکونه ورکړي دي.
(( ګډه شتمني )) د چين د عصري کېدو لارې يوه بله ځانګړتيا ده. ټول وګړي باید برابر وي او ټول دې له ښه ژوند څخه برخمن شي. د چينايانو په نظر کې (( ټوله نړۍ يوه کورنۍ ده))، دغه راز د ټولو د ښه ژوند لپاره د چين د عصري کېدو لار په دې معنا ده، چې دغه هېواد به د ورخلاصون کچه لا لوړه کړي، له نړۍ سره به نور زيات بازاري فرصتونه شريک کړي او د نړيوال اقتصاد د احيا لپاره به لا پياوړی قوت برابر کړي.
د چين د عصري کېدو جريان د ايکولوژۍ په برخه کې ټولو ته ګټې رسوي. دغه هېواد د ژوند او پيدايښت متنوعيت د خونديتوب لپاره د ۲۳۰ زرو کيلومتره مربع په مساحت څو ملي پارکونه جوړ کړي، چې پکې د دغه هېواد د ۳۰ سلنه ډولونو مهم وحشي حيوانات او نباتات ساتل کيږي. بر سيره پر دې، چين د چاپيريال د ساتنې او ښه والي لپاره د کاربن د ايستنې د کمولو او د بيا کارېدونکو انرژیو د پرمختګ او استعمال په برخو کې ډېرې هڅې کړي دي. له دې څخه ښکاري، چې د چين د عصري کېدو لار د انسان او طبيعت ترمنځ د همغږۍ او پرمختګ په بڼه او له نورو هېوادونو سره د پاکې او ښکلې نړۍ د ابادۍ په موخه لار ده، نه د ځمکنۍ کرې د چاپيريال او سرچينو د خرابولو په بيه.
بر سېره پر دې، د چين د عصري کېدو لار به د لوړې ټېکنالوژۍ او بااستعدادو کسانو د تګ راتګ په شمول زياتو برخو کې نړۍ ته ډول ډول ګټې ورسوي.
د چين د کمونېست ګوند شلم ملي کانګرېس به د اکتوبر په ۱۶مه نېټه پرانيستل شي او هغه وخت به نړيوالو ته د چين صميميت لا څرګند کړي.