په وروستيو کې د چين د کمونېست ګوند شلم ملي کانګرېس په نړيوالې ټولنې کې د پاملرنې وړ ګرځېدلی دی. د دې کانګرېس د پای په درشل کې د بهرنيو هېوادونو شخصيتونو په جلا جلا توګه څرګنده کړې چې دغه کانګرېس تاريخي اهميت لري چې همدا به نه يوازې پر چين ژوره اغېره وکړي، بلکې د ننګونو او ستونزو د لرې کولو لپاره د بېلا بېلو هېوادونو د هڅو او د ګډو پرمختګونو د موندلو خوځښت راوړي. د ډېرو هېوادونو سياستوال هم په دې اند دي چې په نوې زمانې کې د چين د خصوصيت لرونکي سوسياليستې مفکورې په رڼا کې به د چين کمونېست ګوند خامخا د چينايانو په مشرۍ په هر اړخيزه توګه سوسیاليستي عصري او غښتلی هېواد اباد کړي، د پرمختګ دويمه سليزه موخه به تر سره کړي او د چيني شکله عصري کېدو له لارې به د چيني ملت د لويې بيا سمسورتیا د پرمخبيولو ترڅنګ نړيوال پرمختګ پرمخبوزي.
د لاوس د دولت رئيس تونګلون سيسوليټ د چين ميډيا ګروپ له خبريال سره د مرکې په ترڅ کې وويل، د ملګري شي جين پينګ په محور د چين د کمونېست ګوند د مرکزي کميټې تر مشرۍ لاندې چين په سالم او ثابت ډول پرمختګ موندلی دی. څو ځلې مې له ملګري شي جين پینګ سره وکتل. هغه یو داسې مشر دی چې ټينګه اراده او پياوړې توان لري. لاوس د نړيوال پرمختګ، نړيوال امنيت او يو کمربند او يوې لارې په اړه د ده له خوا له وړاندې شويو وړانديزونو څخه پوره ملاتړ کوي او ډېرې ګټې يې هم ترې اخيستې دي. مونږ باور لرو چې د چين د کمونېست ګوند شلم ملي کانګرېس به خامخا ډېرې لاسته راوړنې ولري او د چين ځانګړتيا لرونکي سوسياليسزم د ابادۍ او د چين د دويمې سليزې موخې د پوره کولو لپاره ګټور وي.
د پاکستان د بهرنيو چارو وزير بلاول بوټو زرداري د چين مېډيا ګروپ له خبريال سره په مرکې کې ويلي چې د چين د کمونېست ګوند د مرکزي کميټې د عمومي منشي شي جين پينګ په مشرۍ د چين ولسي جمهوريت د چیني ملت د لويې بيا سمسورتيا په لوري چټک ګامونه پورته کړي دي. د چين د کمونېست ګوند شلم ملي کانګرېس د نړيوال سياسي، اقتصادي او ټولنيز جوړښت د بدلېدو په حال کې ترسره شو. زه باور لرم چې چين به د دغه هېواد د کمونېست ګوند په مشرۍ په دوامداره توګه د نړيوال سياست او سولې لپاره خپل مثبت رول ولوبوي.
د ايټاليا د عدليې پخواني وزير او د روم پوهنتون د قانون پوهنځي مشر ديليبوتو د دې کانګرېس په اړه ويلي چې د رئيس شي جين پينګ په مشرۍ د چين د کمونېست ګوند مارکسيزم نوی کړی او د چينايانو په مشرۍ يې د ملي ارمان د رښتيا کولو په لوري ګامونه پورته کړی دی. چين په نړۍ کې يو داسې ځواک ګڼل کېږي چې سوله او همکاري هڅوي او د بېلا بېلو هېوادونو د خلکو په منځ کې يې خنډونه نه، بلکې د همکارۍ پلونه جوړ کړي دي. دا د خوښې وړ ده.
د ډېرو هېوادونو سیاستوالو هم ويلي چې چين د بې وزلۍ د له منځه وړلو او د نسبتاً شتمنې ټولنې د هر اړخيزې ابادۍ لپاره ښه کارونه تر سره کړي دي. د چين د برياليتوب له کبله به لا زیات پرمختيایي هېوادونه په زړه ورتوب سره د هېواد د پرمختګ او سمسورتيا لپاره لارې چارې ولټوي او چين د نړۍ د عصري کېدو لپاره نړيوالو ته چيني پوهې او لايحې وړاندې کړې دي.
د نايجريا پخواني ولسمشر اوباسنجو د ياد کانګرېس په هکله وويل، د چین د کمونېست ګوند په ټولنيز او اقتصادي پرمختګ کې ډېرې لاسته راوړنې لري او دا د ستاينې وړ ده او په ورته وخت کې يې له بې وزلۍ څخه څو سوه ميليونه کسان ژغورلي چې دا معجزه بلل کيږي. څرنګه چې زه د بې وزلۍ د له منځه وړلو پر ستونزو ښه پوهيږم. زمونږ هېواد ښايي د چين موډل نه شو کاپي کولی، خو ترې د ډېرو تجربو زده کړه کولی شو.
دغو سياستوالو دا هم ويلي چې د دې کانګرېس په راپور کې د خلکو د ژوند د لاښه والي او د خلکو د ژوند د کيفيت د لوړوالي په اړه محتوا تائید شوې ده. له دې څخه د خلکو د ګټو په مرکزيت د چين د کمونېست ګوند واکمنه مفکوره ښکاري چې همدا د خلکو په رهبرۍ سره د دې ګوند د ډېرو لاسته راوړنو کليدي لامل هم دی. چينايان به له نړيوالو سره د انسانانو د لاښې ايندې د برابرولو لپاره ګډې هڅې وکړي.