د چين د دولت رئيس شي جين پينګ د نومبر په دوهمه نېټه په بېجينګ کې د خلکو په لوی تالار کې د پاکستان له صدراعظم محمد شهباز شريف سره وکتل.
شي جين پینګ د چين او پاکستان ترمنځ اړيکې پیاوړې او لوړې وارزولې او ويې ويل، چې هېواد به يې تل له پاکستان سره اړيکو ته په خپلو ډيپلوماتيکو اړيکو کې لومړيتوب ورکړي، د خپلمنځي هراړخيزو ستراتېژيکو همکاريو سويه به لوړه کړي، د نوې زمانې لپاره به د دواړو هېوادونو ترمنځ د ګډ برخليک ټولنې ابادي چټکه کړي او د ټولو فصلونو خپلمنځي ستراتېژيکو همکاريزو اړيکو ته به نوی خوځنده ځواک ورکړي.
شي جين پينګ وويل، چين د دواړو هېوادونو ترمنځ د دوستانه همکارۍ په پرمخ بېولو کې د پاکستان ټينګو هڅو ته د قدر په سترګه ګوري او په خپلو مهمو موضوعاتو کې د پاکستان له ملاتړ څخه مننه کوي. چين به د ملي حاکميت، ځمکنۍ بشپړتيا، د پرمختګ ګټو، ملي حيثيت د ساتلو، همدارنګه د هېواد د ټيکاو، يووالي، پرمختګ او سمسورتيا د رامنځته کولو په برخو کې به له پاکستان څخه ټينګ ملاتړ وکړي. هغه زياته کړه، چې چين د سېلاب ځپلو پاکستانيانو سره په غم کې ځان شريک ګڼي او ورسره به نورې بېړنۍ مرستې هم وکړي. د بيارغونې او د کرنيزو توليدي چارو د بيا پيل مرسته به وکړي او د ناورينونو د مخنيوي او کموالي او د اقليمي بدلون سره د مبارزې په برخو کې به خپلمنځي همکارۍ پياوړې کړي.
شي جين پينګ محمد شهباز شريف ته د چين د کمونېست ګوند د شلم ملي کانګرس لاسته راوړنې هم وروپېژندلې او ويلي يې دي، چې هېواد به يې د ورخلاصون پر سياست ټينګار وکړي او د خپلې نوې ودې له لارې به د پاکستان په ګډون بېلابېلو هېوادونو ته نوي فرصتونه برابر کړي. چين به له پاکستان سره د پرمختګ ستراتېژۍ وصل کړي، د دواړو هېوادونو ترمنځ د اقتصادي دهلېز د همکارۍ کمېټې له ميکانيزم څخه به ګټې پوره کړي، څو په لوړ موثريت سره دغه اقتصادي دهلېز اباد کړي او د يو کمربند او يوې لارې د باکيفيته پرمختګ د نمونوي پروژې په توګه وګرځي.
نوموړي وويل چې دواړه هېوادونه باید د ګوادر بندر د زېربناوو ابادي چټکه کړي، څو د سيمې د اتصال لپاره زیات رول ولوبوي. دغه راز باید د پاکستان د لومړي نمبر رېل پټلۍ د اصلاح پروژې او پر کراچۍ ښار د چارچاپېر رېل پټلۍ پروژې د پيل لپاره زمينه برابره کړي.
نوموړي خپل هېواد ته د پاکستان د کرنيزو محصولاتو د صادراتو د زياتوالي هرکلی وکړ او ويې ویل، چې چين به له پاکستان سره د ډيجيټلي اقتصاد، برېښنايي سوداګرۍ او نويو انرژيو په برخو کې همکارۍ پراخې کړي. د کرنې، ساينس او د خلکو ژوند د ښه والي په برخو کې خپلمنځي همکارۍ ته به ثابت پرمختګ ورکړي او تر خپلې وسې پورې به د اقتصاد په ثابت ساتلو کې ورسره مرسته وکړي. نوموړي هيله وښودله چې پاکستان د هغو چيني ارګانونو او اتباعو لپاره چې د يادو همکاريزو چارو لپاره پاکستان ته تللي، خوندي چاپېريال برابر کړي.
د چين د دولت رئيس شي جين پينګ په اشارې سره سره وويل، اوسمهال د نړۍ، زمانې او تاریخ بدلونونه په بې ساري دول رامنځته کېږي. د نړۍ د ډېرو نامعلومو عواملو پر وړاندې دواړه هېوادونه دې د تاريخ په سم لوري ټينګ ولاړ وي، په نړيوالو څو ميکانيزمونو کې دې خپلمنځي لوړه سويه لرونکې همکارۍ وساتي، په مهمو نړيوالو او سيمه ييزو موضوعاتو کې دې نږدې همغږي وساتي، دغه راز رښتيني څواړخېزم او د مخ پر ودې هېوادونو ګډې ګټې دې خوندي وساتي او د نړۍ پرمختګ ته دې مثبت ځواک ورکړي.
محمد شهباز شريف وويل، هغه په دې ډېر وياړي چې د چين کمونېست ګوند د شلم ملي کانګرس له بريالي ترسره کېدو وروسته دغه هېواد ته سفر کوي او دغه سفر يې د دواړو هېوادونو ترمنځ د ټينګې دوستۍ ښکارندويي کوي. هغه باور وښوده چې د شي جين پينګ په ټينګې مشرۍ به چین زيات پرمختګ ومومي او د دواړو هېوادونو ترمنځ ستراتېژيکې همکارۍ او دوستۍ به نورې هم ټينګې شي.
هغه وويل، چین په تېرو لسو کلونو کې د شي جين پينګ په مشرۍ ستر پرمختګونه کړي او د څواړخېزم، نړيوال يووالي او همکارۍ، نړيوالې سولې او پرمختګ د ساتلو لپاره يې مهم خدمتونه کړي دي، چې د لوی هېواد په توګه د چين مسئوليت ترې ښکاري. هغه زیاته کړه، چې نړۍ چين ته اړتيا لري او هر قوت د چين د پرمختګ مخه نه شي نيولی.
نوموړي د کرونا وبا او سېلابونو پر وړاندې مبارزه کې د چين له مرستو مننه وکړه او ویې ويل، چې هېواد به يې د واحد چين پېژندنې پر اصل ټينګار وکړي، له چين سره به په بېلابېلو برخو کې خپلمنځي همکارۍ پياوړې کړي. نوموړي زیاته کړه، چې له چين سره د پاکستان ټينګه دوستي د خرابولو نه ده او پاکستان به تل له چين سره ټينګ ولاړ وي.