د ملګرو ملتونو د بيولوژيکي تنوع تړون د لاسليک کوونکو ۱۵مې غونډې (COP15) دوهم پړاو د ډسمبر په ۷مه نېټه د کاناډا په مونتريل کې پرانيستل شو.
د چين د بهرنيو چارو وزارت وياندې ماو نينګ په بېجينګ کې يوې مطبوعاتي غونډې ته د کوپ ۱۵ د دوهم پړاو په اړه د چين موخې معرفې کړې.
نوموړې وويل، چې چين د کوپ ۱۵ (COP15) د رئيسه هېواد په توګه له بېلا بېلو خواوو سره زياتې همکارۍ کړي او د (( له ۲۰۲۰م کال وروسته د بيولوژيکي تنوع نړيوال چوکاټ )) د تصويب لپاره به کوښښونه وکړي او د دې غونډې ټوله اجنډا به په ښه توګه تطبیق کړي.
ماو نينګ زياته کړه، چې چين بيولوژيکي تنوع ته ډېره پاملرنه کوي او ساتنې ته يې په درنه سترګه ګوري.
نوموړې وويل، چين د کوپ ۱۵ (COP15) رئيسه هېواد په توګه په تېر اکتوبر کې د بيولوژيکي تنوع د ساتنې لپاره فعال خدمتونه کړي او هم يې د تېر ۲۰۲۱ کال په اکتوبر کې د کوپ ۱۵ سرمشريزې کوربتوب کړی دی.
د کوپ ۱۵ د تېر کال په سرمشريزې کې د چين د دولت رئيس شي جين پينګ په شمول د ۹ امضا کوونکو مشرانو او د ملګرو ملتونو سرمنشي ګډون کړی و او په خپلو ويناوو کې يې د غونډې سیاسي قوې ته خوځښت ورکړی دی.
شي جين پينګ د کوپ ۱۵ د ۲۰۲۱م کال په سرمشريزې کې د انسانانو د باکيفيته پرمختګ د نوي سفر په اړه څلور وړانديزونه وکړل او د کوربه هېواد په توګه يې يو لړ تدبيرونه اعلان کړل، چې د ساري په توګه يې د کون مينګ د بيولوژيکي تنوع د صندق د جوړونې لپاره ۱ ميليارډ او ۵۰۰ ميليونه يوانه يادولی شو او باور دا دی، چې د چين داسې تدبیرونه به د بيولوژيکي تنوع ساتنې ته متحرکه قوه برابره کړي.