په چين کې نوی قمري کال يعنې د سوی کال پيل شوی او د کرونا وبا د وقايې او کنټرول تګلارې له تعديل وروسته لومړی پسرلنی جشن تېر شوی دی.
پسرلنی جشن د چينايانو لپاره تر ټولو مهم جشن دی. چينايان د دغه جشن په درشل کې خپلو ټاټوبو ته ستنېږي او له کورنيو سره يو ځای دغه اختر لمانځي، نو په چين کې هر کال په دغه موده کې د مسافرو عمومي شمېر څو ميليارډو تنو ته رسېږي او همدغه موده په نړۍ کې د خلکو د تګ راتګ ډېره لويه څپه بلل کېږي. چون يون (春运) د چين د پسرلني جشن د ځانګړي ترافيکي پلان نوم دی. دغه پلان هر کال د چين د پسرلني جشن له پېل پنځلسمې ورځې مخکې پيل کيږي او څلوېښت ورځې دوام مومي. دغه راز چون يون نه يوازې د چينايانو لپاره مهم کار دی، بلکې د دغه هېواد اقتصاد ته د کتنې کړکۍ بلل کيږي.
اورګاډيو په چون يون کې مهم رول لوبولی. د شمېرنې له مخې، په چين کې د جنورۍ له اوومې نېټې څخه تر يوويشتمې نېټې پورې يعنې له پسرلني اختر مخکې پنځلسو ورځو کې يو سلو نهو ميليونو او پنځه سوه درې څلوېښتو زرو خلکو په اورګاډیو کې سفرونه کړي، چې دغه رقم د تېر کال د همدې مودې په پرتله اوويشت اعشاريه درې سلنه زياتوالی ښيي. د سږ کال د پسرلني جشن په رخصتۍ کې يعنې د جنورۍ له يوويشتمې نېټې څخه تر اوويشتمې نېټې پورې په چين کې د اورګاډيو، موټرو، بېړيو او الوتکو له لارې د لېږد رالېږد شويو مسافرو شمېر دوه سوه او شپږويشتو ميليونو ته رسېدلی، چې له دې جملې څخه پنځوسو ميليونو او يو سلو څلور اويا زرو خلک په اورګاډيو کې تګ راتګ کړی او دغه رقم د تېر کال د همدې مودې په پرتله اوه پنځوس سلنه زياتوالی ښيي.
د دغه جشن په موده کې د چين مصرفي بازار بيا سمسورتيا ثابته کړې، چې د شيانو د اخيستلو، په رسټورانټونو کې د ډوډۍ خوړلو او عشرت په برخو کې د چينايانو د مصارفو شوق او زوق لوړ شوی او د دغه هېواد په زياتو سيلانيزو سيمو کې د سيلانيانو شمېر هم ډېر زيات شوی دی.
د مختلفو ډولونو او موضوعاتو اووه چيني فلمونه د پسرلني جشن په موده کې د دغه هېواد په سينماګانو کې نندارې ته وړاندې شوي او د پلورل شويو ټکټونو اندازه يې له شپږ ميليارډو او اووه سوه اته پنځوس مليونو يوانو څخه اوښتې ده، چې دا رقم د تېرو کلونو د همدې مودې په ريکارډونو کې دوهم ځای نيولی دی.
د چين د اې کچې لس زره اوه سوه او نهه دېرش سيلانيزې سيمې د پسرلني جشن په موده کې په عادي توګه د خلکو پر مخ پرانيستل شوې، چې دا رقم د دغه هېواد د اې کچې په ټولو سيلانيزو سيمو کې له درې اويا اعشاريه پنځه سلنې سره برابر دی. د چين د کلتور او سيلانۍ وزارت د شمېرنې له مخې، درې سوه او اته ميليونو چينايانو د روان کال د پسرلني جشن په رخصتۍ کې په هېواد کې دننه سيلانيز سفرونه کړي، چې دا شمېر د تېر کال د همدې مودې په پرتله درويشت اعشاريه يو سلنه زياتوالی ښيي. په ورته موده کې د کورنيو سيلانيزو چارو عايدات درې سوه او پنځه اويا مليارډه او اته سوه او درې څلوېښت مليونه يوانه ښودل شوي چې دا شمېر د تېر کال د همدې مودې په پرتله دېرش سلنه زياتوالی ښيي.
په بهرنيو هېوادونو کې د چيني سيلانيانو شمېر هم زيات شوی. د پسرلني جشن د رخصتۍ په لومړيو شپږ ورځو کې له چين څخه بهر ته د تللو او له بهر څخه چين ته د راغلو خلکو شمېر دوه ميليونه او درې سوه او دوه نوي زره ښودل شوی، چې د تېر کال د همدې مودې په پرتله يو سلو درويشت اعشاريه نهه سلنه زيات شوی. د شمېرنې له مخې، د پسرلني جشن په موده کې د چيني سيلانيانو د بهرنيو سفرونو د سپارښتنو شمېر د تېر کال د همدې مودې په پرتله شپږ سوه او څلوېښت سلنه زياتوالی ښيي.
په پسرلني جشن کې د چين تود بازار د روان کال د ښه اقتصادي پرمختګ پيل بلل کيږي او د چين د اقتصاد فعاله بالقوه ځواک ښکارندويي کوي. باور لرو، چې د چين اقتصاد به د نړيوال اقتصاد احيا تحريک کړي او د کرونا وبا له تيورۍ څخه د نړيوال اقتصاد له وتلو سره به مرسته وکړي.
(د چين ميډيا ګروپ د پښتو څانګې خبرياله ياسمين)