د روان کال د مارچ يوولسمه نېټه په جاپان کې د ختيځې سيمې د لويې زلزلې او د فوکوشيما د اټومي برېښناکوټ پېښې د رامنځته کېدو له دوولسمې کليزې سره برابره وه. د دغه هېواد د ډېرو سيمو خلکو په همدې ورځ سمندر ته د نوموړي برېښناکوټ د ککړو اټومي اوبو د خوشي کولو پلان پر ضد لاريونونه تر سره کړل.
د جاپان د بېلا بېلو برخو شخصيتونه د مارچ په يوولسمه نېټه د توکيو برېښنايي شرکت د دروازې پر وړاندې راغونډ شول او د شعارونو په پورته کولو سره يې په لوړ غږ د نوموړي شرکت او جاپاني حکومت د هغه پلان پر ضد نارې ووهلې، چې د دغه پلان له مخې به سمندر ته ککړې اټومي اوبه خوشي شي.
د توکيو اوسېدونکې او د ياد لاريون ګډون کوونکې توموکو ايتو خبريال ته وويل، چې هغه سمندر ته د ککړو اټومي اوبو د خوشي کولو له پلان سره ټينګ مخالفت لري او د هغې په نظر دغه پلان د منلو وړ نه دی، ځکه دا پلان به نه يوازې د جاپانيانو د شکونو سبب وګرځي، بلکې ټولې نړۍ ته به ستونزې ورسوي. راډيو اكټيف مواد به په ټولې نړۍ کې خپرېږي او د کبانو په وجودونو کې زېرمه کېږي، که وګړي دغسې سمندري محصولات وخوري، منفي دوران به دوام ولري.
د ياد لاريون ګډون کوونکې اتسوکو کيوچي خبريال ته وويل، د جاپان حکومت هغه کړنې د بښنې وړ نه دي، چې د دغه پلان له جوړولو مخکې يې له ځايي وګړو سره د نظريو هېڅ تګ راتګ نه دی کړی. هغې زياته کړه، چې د جاپان حکومت د مارچ د يوولسمې نېټې زلزلې له رامنځته کېدو وروسته خلکو ته ګڼ شمېر دروغ ويلي دي. خلکو له دغه پلان سره مخالفت څرګند کړی او کوي يې. د جاپان حکومت په پوره توګه د کب نيوونکو غږونه نه دي اورېدلي.
د توکيو پر اوسېدونکو سربېره، د فوکوشيما ډېرو وګړو په دغه لاريون کې هم ګډون کړی و. د دغو وګړو په اند، حکومت بايد د ککړو اټومي اوبو د حل په چارو کې جدي او احتياطي رويه غوره کړې وی، خو د دوی هېڅ نظريه يې نه ده اورېدلې.
د فوکوشيما اوسېدونکي او د لاريون ګډون کوونکي يويا شيشيتا خبريال ته د حکومت د پرېکړې په اړه شک وښود او ويې ويل، چې اوس ککړې اټومي اوبه د ذخيرې په ټانکرونو کې ساتل کېږي او د لا زياتو ټانکرونو د جوړولو لپاره ځمکې شته، نو د ځمکو کمښت سمندر ته د ککړو اټومي اوبو د خوشي کولو ډاډمن سبب نه دی او دغه چاره بايد دوام ولري.
ايباراکي فوکوشيما ته نژدې پرته ولسوالي ده او د دې ولسوالۍ يوه پارلماني غړي د توکيو په لاريون کې ګډون کړی و. نوموړي وويل، چې سمندر ته د فوکوشيما د ککړو اټومي اوبو خوشي کول يوازې د فوکوشيما ځايي مسئله نه ده او د شاوخوا سيمو د خلکو پر ژوند به ډېرې اغېزې وکړي.
نوموړي وويل، چې (( که ککړې اټومي اوبه سمندر ته خوشي شي، زموږ د ولسوالۍ کب نيوونکې، سيلانيزې او کرنيزې چارې به له ستونزو سره مخ شي. د خپل ټاټوبي د خلکو د هوسا ژوند او کار په پار له دغه پلان سره ټينګ مخالفت کوم. ځکه د راډيو اكټيف موادو ټريټيوم (tritium) د کمزورېدو موده ۱۲ کاله ده، په دې موده کې بايد ککړې اټومي اوبه په ټانکرو کې وساتل شي. ))
پر ياد شوي لاريون سربېره، په دې وروستيو کې د جاپان د لومړي وزير د ودانۍ او د دغه هېواد د اقتصاد او صنعت وزارت د ودانۍ پر وړاندې، د توکيو د ګينزا سوداګريزې ناحيې او د فوکوشيما په شمول زياتو سيمو کې سمندر ته د ککړو اټومي اوبو د خوشي کولو پلان پر ضد لاريونونه تر سره شول.
د جاپان ۱۶ ورځپاڼو په دې وروستيو کې په ګډه يوه سروې تر سره کړه. د دغې سروې ۴۸،۴٪ ګډون کوونکي سمندر ته د ککړو اټومي اوبو د خوشي کېدو له پلان سره مخالفت کوي او د دوی په اند د دغه پلان منحل به ښه وي. د فوکوشيما د ځايي رسنيو د پلټنو له مخې، د دې ولسوالۍ د ۹۰٪ اوسېدونکو په اند دغه پلان به د فوکوشيما پر بڼې منفي اغېزه وکړي او د ۶۵٪ اوسېدونکو په اند د جاپان حکومت او د توکيو برېښنايي شرکت د دغه پلان د خونديتوب په اړه ډاډمن او کافي توضيحات نه دي وړاندې کړي.