له دې نه وروسته چې د ډېرو امريکايي تصديو چارواکو له چين څخه ليدنې وکړې، د امريکا بهرنيو چارو وزير انتوني بلېنکن د جون له ۱۸مې نېټې څخه تر ۱۹مې نېټې پورې له چين څخه کتنه وکړه. د چين د دولت رئيس شي جين پينګ، د دغه هېواد د کمونېست ګوند د مرکزي کمېټې د بهرنيو چارو کميسيون د دفتر مشر وانګ يي او د دولتي شورا غړي او بهرنيو چارو وزير چين ګانګ په جلا جلا توګه له بلېنکن سره وکتل. يو لړ صميمي او ژورې خبرې اترې دا څرګندوي، چې د چين تاريخ، خلکو او نړۍ ته د مسئولانه رويې پر بنسټ غواړي له امريکا سره ترینګل شوې اړيکې سمې کړي او ورسره يې د همغږۍ پياوړتيا فعاله نښه خپره کړه.
د جون په پيل کې د شانګريلا د شلم ډيالوګ مخکې، بلېنکن دغه خبرې وکړې، چې چين ورسره له کتلو انکار وکړ، دغه راز د امريکا د دفاع وزير ليويډ اوسټين د دغه ډيالوګ په ترڅ کې يوه خوا پر چين بې بنسټه نيوکه وکړه او چين ته يې په ګواښ سره خبرې وکړې، بله خوا يې هغه خبره پوره کړې، چې د چين د دفاع وزير نه غواړي ورسره ملاقات وکړي. هغه افکار چې د امريکا لخوا لمسول شوي، چې چين له امريکا سره د تګ راتګ لپاره فعال نه و، چين ته د بلېنکن له سفر وروسته نارمل شوي دي.
چين هېڅکله له امريکا سره له خبرو ډډه نه کوي، خو امريکا پر چين ډېر بې ځايه فشارونه اچولي، د چين په مرکزي پاملرنې وړ مسئلو کې يې ورباندې بې دليله لمسون کړی، د خبرو اترو اصلي بنسټ مساوي او صميمي نه دی،په دې حال کې چين څنګه ورسره خبرې وکړي؟ له چين څخه د بلېنکن په ليدنه کې دا پوره ليدل کېږي، چې د چين رويه خلاصه او فعاله ده، خو په ورته وخت کې غوښتنه او اصلي لاين لرونکي هم دی.
دا ځل د چين او امريکا د جګپوړو چارواکو خبرو اترو په ترڅ کې پنځه ګډې نظريې تر لاسه شوې او دا د دواړو هېوادونو د اړيکو لپاره فعال پرمختګ دی. په دې جمله کې دواړو خواوو موافقه کړې، چې د فرهنګ او ښوونې په برخو کې د دواړو هېوادونو د تبادلې هڅونه وکړي، يو بل هېواد ته د خپلو زده کوونکو، پوهانو او صنعت او سوداګرۍ شخصيتونو د تګ راتګ هرکلی به وشي. دغه ګډه نظريه د اوس مهال په بېلا بېلو ساحو کې د دواړو هېوادونو د نه جلا کېدونکو همکاريو له له لارې رامنځته شوې.
د امريکا د بيل ګېټس او ميلينډا ګېټس صندوق مشر او د ميکرو سافټ شرکت بنسټ ايښودونکي بيل ګېټس، د امريکا د تيسلا شرکت اجرايوي ریيس ايلن ماسک، د امريکا د اپل شرکت لومړی اجرایوی مشر ټيموسي ډونالډ کوک او د دغه هېواد د ساينس او ټکنالوژيو د مشهورو تصديو چارواکو په پر له پسې ډول له چين څخه ليدنې وکړې. د امريکا حکومت دې دا فکر وکړي، چې حکومت څنګه د تصديو لارښوونه کړي، چې له چين سره اړيکې پرې کړي، خو تصدۍ به د بازاري اصولو له لارې پراخ او سالم بازار او ثابت او پوخ صنعتي ځنځير په لټه کې وي. د امريکا حکومت د خپلو ګټو لپاره له دغو تصديو سره اړيکې نه شي پرې کولی، او د دوی او چيني تصديو تر منځ د همکاريو مخنيوی نه شي کولی. تمايل دا دی چې د امريکا حکومت د خپلو تصديو لپاره له چين سره د همکارۍ سالم چاپېريال او شرايط جوړ کړي.
اوسمهال امريکا د چين په هکله لا هم ناسم پوهاوی لري، د چين د تايوان او شينجيانګ په شمول مسئلو کې ټکر کوي، د چين اقتصادي پرمختګ ته د ګواښ په سترګه ګوري، غواړي له چين سره پوځي همکارۍ پياوړې کړي، خو پر چين بې بنسټه بنديز لګوي. که امريکا غواړي په رښتينې او عادلانه توګه له چين سره همغږۍ او همکارۍ وکړي، لومړی په خپله تضادونه نه جوړوي او له سرچينې څخه مسئلې حل کړي.
ټول شيان د يو بل سره د ټکر پرته په همدې وخت کې وده کولی شي، هر شی خپل لار لري او هر يو له بل سره مخالفت نه کوي. لکه له چين څخه د بلېنکن د ليدنې په وخت کې د چين د دولت رئيس شي جين پينګ وويل، چې چين او امريکا د ځمکې په لویه کره کې ځای لري او نړۍ دا مني چې دغه دواړه هېوادونه په خپلو هڅو سره پرمختګ او سمسورتیا مومي. د چين خلک د امريکايانو په شان غيرت، باور او قوت لرونکي دي او د نېکمرغه ژوند لټولو حقونه لري، د دواړو هېوادونو ګډو ګټو ته بايد درناوی وشي او دواړه هېوادونه د خپلو زحمتونو پرمټ بری مومي او د هر لوري بری به د مقابل لوري لپاره فرصتونه برابروي، نه ګواښونه. که امريکا د چين د پرمختګ په وخت کې رامنځته شوي بازارونه او خدمتونه فرصتونو ته ګوري، ډېرې مسئلې به حل کېږي.