د امریکې د استازو مجلس مشر کېون مکرتي د سپتمبر په ۱۲مه اعلان وکړ چې د دغه مجلس له اړوندې کمېټې څخه يې غوښتنه کړې چې پر ولسمشر جوبايډن د استيضاح پلټنه پيل کړي.
کېون مکرتي د جمهوریپال ګوند غړی دی او جوبایډن د دیموکرات ګوند غړی دی.
د امریکې د خبري رسنیو د لیکنو له مخې، د کېون مکرتي د دغه اقدام موخه د جمهوریپال ګوند په دننه کې د ځينو کسانو کلکه لېوالتیا تسکین کول دي چې غواړي پر بایډن جدي پلټنه ترسره کړي. په دې سره ښايي په راتلونکي ۲۰۲۴م کال کې د امریکې د دواړو ګوندونو د ټولنې پر نتیجې اغېزه وشي.
کېون مکرتي د سپتمبر په ۱۲مه په کانګرس کې اعلان وکړ چې د استازو مجلس کې د جمهوريپال ګوند غړو د مرستیال ولسمشر په توګه د جوبایډن د ماموریت په موده کې د ده زوی هنټر بایډن پر بهرنۍ سوداګرۍ پلټنه کړې او د بایډن کورنۍ لخوا د فساد، د واک بدې استفادې په اړه يې ځینې شواهد تر لاسه کړي دي. کېون مکرتي د استازو مجلس د څارنې کمېټې څخه وغوښتل چې پر جوبایډن کورنۍ د استيضاح پلټنې پروسې لارښوونه وکړي.
د مالوماتو له مخې، د استازو مجلس د عدلي کمیسیون او د پیسو راټولوونکې کمېټه به هم په یاده پلټنه کې برخه ولري.
د رویټرز خبري اژانس وايي چې د کېون مکرتي په یاد شویو شواهدو کې د جوبایډن غیر قانوني کړنې شاملې نه وې.
د امریکې څو رسنیو د کېون مکرتي یاد عمل یواړخیز عمل بللی، او ویلي يې دي چې د ده یاد اعلان د استازو مجلس عمومي رایې اچونې ته نه ده وړاندې شوې.
واشنګټن پوسټ د سرچینو په قول ویلي، د کېون مکرتي ګروپ د وروستۍ پلټنې نتیجه ښيي چې که پر جوبایډن د استيضاح پلټنې پرېکړه د استازو مجلس عمومي رایې ته وړاندې کېږي، نیمه برخه رایې نه شي تر لاسه کېدای.
رویترز په اشارې ویلي، چې په استازو مجلس کې د جمهوريپال ګوند شاوخوا شل تنه غړي له یادې پرېکړې سره مخالفت کوي. خو په دغه مجلس کې د جمهوریپال ګوند د غړو شمېر له ډیموکرات ګوند یوازې ۱۰ تنه زیات دی.
د امریکې څو رسنیو په اشارې ویلي چې کېون مکرتي د يادې پلټنې اعلان د جمهوريپال ګوند په دننه کې په تېره بیا د کلکې محافظه کارې ډلې تر فشار لاندې کړی. د دغو غړو په اند، کېون مکرتي د فدرالي حکومت بودیجې د کمولو په اړه خپله هغه ژمنه نه ده پوره کړې چې د سږ کال په جنورۍ میاشت کې د استازو مجلس په ټاکنو کې د بریالیتوب په وخت کې يې کړې وه. دوی له مکرتي وغوښتل چې د استازو مجلس د پیسو تخصیص مصوبې په اړه د مشورې په وخت کې د دوی اړتیاوې پوره کړي.
د ډیموکرات ګوند غړو د سپتمبر په ۱۲مه په جلا جلا توګه پر کېون مکرتي نیوکې وکړې. د سپینې ماڼۍ ویاند یان سامس پر جوبایډن د استيضاح پلټنې پرېکړه تر ټولو خرابه او یو اړخیزه سیاسي پرېکړه بللې.
رویټرز په اشارې ویلي، چې د امریکې د استازو مجلس به په راتلونکو څو میاشتو کې پر جوبایډن د استيضاح پلتڼې په اړه استماعیه غونډې ترسره کړي او په دې سره ښايي د ۲۰۲۴م کال د دغه هېواد پر ولسمشریزو ټولټاکنو فشارونه واچول شي.
د یادولو وړ ده چې ډونالډ ټرمپ او جوبایډن به د راتلونکي کال په ولسمشریزو ټولټاکنو کې ګډون وکړي.
شنونکي وايي چې د مسوولینو استیضاح د امریکا د دوو مشهورو ګوندونو ترمنځ یو د بل پر ضد د برید وسیله ګرځېدلې او له دې ښکاري چې د امریکا په سیاسي ډګر کې ستر بدلون رامنځته شوی دی.
سیاستوالو د ولسي خلکو ګټو ته شا کړې او د خپلو ګټو لياره يې پر سیاسي سیالانو بریدونو او تورنولو ته يې زیاته مخه کړې ده.
اوس د واشنګټن فضا هره ورځ له نیکو او لفظي شخړو ډکه وي، سیاسي تاوتریخوالی يې مخ په سختېدو دی او آن اټکل کېږي چې په دغه هېواد کې سیاسي سیسټم مخ په ړنګېدو دی.