د سپتمبر په ۲۸مه د ناټو سرمنشي او د بريتانيا او فرانسې د ملي دفاع وزيرانو په  ناڅاپي توګه د اوکراين له پلازمېنې کيف څخه ليدنه  وکړه او په دغه هېواد کې د وسلو د توليدولو موخه يې څرګنده کړه. د دې مياشتې په ۲۹مه ، د اوکراين حکومت له نړيوالو وسلو پلورونکو سره يو فورم جوړ کړ او هيله يې  وښودله،‌ چې د نړيوالو وسلو پلورونکي د وسلو د توليدولو او ترميمولو په برخو کې د اوکراين توان لوړ کړي.

د اوکراين د بهرنيو چارو وزير دميترو کولېبا  وویل، چې د ۲۶ هېوادونو د ۱۶۵ تصديو استازو په ياد فورم کې ګډون  وکړ. له دې څخه يوه ورځ مخکې د ناټو سرمنشی جینس ستولتنبېرګ په اوکراين کې د دې هېواد له ولسمشر زيلنسکي سره په لیدنه کې  وویل، چې دا به د اوکراين او ناټو لپاره مهم فرصت وي، چې خپلمنځينوې همکاريزې اړيکې جوړې کړي.