د ملګرو ملتونو د بشري چارو همغږۍ ادارې د نومبر په ۲۰مه نېټه په يوه اعلامیه کې ویلي، چې په غزه تړانګه کې د فلسطين او اسرائيل ترمنځ د روانې شخړې له امله لږ تر لږه يو ميليون او ۷۰۰ زره تنه له خپل کور څخه جلا شوي، پکې څه باندې ۹۰۰ زره تنه په غزه تړانګه کې د ملګرو ملتونو په ۱۵۴ لنډمهالي پنډغالو کې اوسېږي.
د مصر رسنيو د نومبر په ۲۰مه نېټه خبر ورکړ، چې هېواد يې په همدې ورځ له رفح بندر څخه د غزې ۲۸ تازه زېږېدلي ماشومان خوندي کړي او دا ټاکل شوې، چې د دې هېواد ۳۸ زره ډاکتران او ۲۵ زره نرسې به له غزې څخه راغلو ټپيانو لپاره طبي خدمتونه برابر کړي.
د فلسطين د غزې تړانګې طبي ادارې د نومبر په ۲۰مه نېټه په يوه اعلاميه کې ويلي، چې د اسرائيل ځواکونو په همدې ورځ د غزې په شمالي برخه اندونيزيا روغتون بريد کړی، پکې يې ۱۲ تنه ووژل او سلګونه تنه يې ټپيان کړي دي. د فلسطين د نورو رسنيو د خبر له مخې، تر اوسه پورې ياد روغتون د اسرائيلي ځواکونو لخوا کلابند شوی، په دې روغتون کې لا هم شاوخوا ۷۰۰ طبي کارکوونکي، ټپيان او زرګونه بې کوره تنه پاتې دي.
د دې تر څنګ، د فلسطين سرچينې ويلي، چې اسرائيلي ځواکونو په همدې ورځ د غزې په مرکزي برخه د براج کډوالو پنډغالي کې د ملګرو ملتونو پر يو ښوونځي هوايي بريد کړی چې له دې امله لږ تر لږه ۱۲تنه وژل شوي دي.
د فلسطين امنيتي ادارې د معلوماتو له مخې، د سيار روغتون سامان الات په همدې ورځ له اردن نه د رفح بندر له لارېغزې ته رسېدلي، دغه سيار روغتون به د غزې په جنوب يونیس ښار کې جوړ شي.
د ترکيې د رسنيو د خبر له مخې، له غزې څخه راغلي د دوهمې جوپې ۶۱ سخت ناروغان د نومبر په ۲۰مه نېټه په يوه الوتکه کې ترکیې ته رسېدلي او د درمنلې لپاره د پلازمېنې انقرې دوو روغتونونو ته لېږدول شوي دي. د خبر له مخې، له دې جملې څخه ځينې يې په غزې تړانګه کې د ترکيې - فلسطين د دوستۍ روغتون سرطان ناروغان دي. دغه روغتون په غزه تړانګه کې د سرطان د درمنلې يوازينی ځانګړی روغتون دی چې په دې وروستيو کې د هوايي بريد او د سون موادو د کمښت له مله بند شوی دی. د ترکيې د روغتيا وزير ویلي، چې تر اوسه پورې د غزې ۸۸ سخت ناروغان په دغه هېواد کې تر درمنلې لاندې دي. د روغتيا نړیوال سازمان د شمېرنې له مخې، اوس په غزه تړانګه کې څه باندې دوه په درېيمې برخه روغتونونو خپلې چارې بند کړې دي.
د اسرائيل د ملي دفاع پوځ د نومبر په ۲۰مه نېټه په يوه اعلاميه کې ويلي، چې د لبنان د حزب الله ډلې د دغه هېواد شمال ته ۲۵ راکټونه توغولي، ځينې يې د اسرائيل د هوايي برید ضد سيستم لخوا مخنيوی شوي دي. د اسرائيل شمالي برخه په همدې ورځ لا هم د ۳ بې پيلوټه الوتکو لخوا تر بریدونو لاندې راغلې، خو هېڅ مرګه ژوبله یې نه ده رسولې. د دې اعلاميې له مخې، د دغه هېواد پوځ په ځوابي عملياتو پيل کړي او د جنګي الوتکو او ټانکونو له لارې يې د لبنان د حزب الله ډلې پر اساسي تأسيساتو بريد کړی دی.
د يمن د حوثي وسله والو وياند يهیا ساريا د نومبر په ۱۹مه نېټه په يوه اعلاميه کې ويلي، چې ياد سازمان په سور سمندرګي کې پوځي عمليات تر سره کړي، په دې بهير کې يې يوه اسرائيلي کښتۍ نيولې او يمن ته يې ستانه کړې ده. د اسرائيل د ملي دفاع پوځ او د صدراعظم دفتر له دې وروسته په يوه اعلاميه کې ويلي، چې ياده کښتۍ د اسرائيل نه ده او په کښتۍ کې اسرائيليان نه شته.
د قطر صدراعظم او د بهرنيو چارو وزير د نومبر په ۱۹مه نېټه د اروپايي ټولنې د ډيپلوماتيک او امنيتي پاليسۍ له لوړپوړي استازي جوزپ بورل سره په يوه ناسته کې ويلي، چې د اسرائيل او حماس ترمنځ د شخړو د حل لپاره منځګړتوب روان دی.
د مصر رسنيو د نومبر په ۱۹مه نېټه خبر ورکړی، حماس او اسرائيل د بنديانو د تبادلې په اړه تړون جوړ کړ. خو د حماس سرچينې ياد خبر رد کړی او ويلي يې دي، چې دواړه خواوې تر اوسه پورې اخري موافقې ته نه دي رسېدلې، خو مذاکراتو يې پرمختګ موندلی دی.
د ايران ملي خبري اژانس د نومبر په ۱۹مه نېټه خبر ورکړ، چې د دې هېواد عالي مشر آیتالله سید علي خامنهای په همدې ورځ له اسلامي هېوادونو څخه غوښتنه کړې، چې د صهیونيت (Zionism) رژيم ته د نرژيو او توکو صادرات بند کړي، او په دې وروستۍ موده کې دې ور سره سياسي اړيکې پرې کړي.
د نومبر په ۱۹مه نېټه، د مراکش په یو شمېر ښارونو کې نوی پړاو لاريونونه رامنځته شوي، چې لاريون کوونکو پکې له فلسطينانو څخه ملاتړ وښود، د اسرائيل د پوځي عملياتو يې غندنه وکړه او د مراکش او اسرائيل ترمنځ د اړيکو له عادي کېدو سره مخالفت يې څرګند کړی دی.
د روسيې د بهرنيو چارو وزارت ویبسایټ د نومبر په ۱۹مه نېټه خبر ورکړ، چې د دې هېواد د بهرنيو چارو وزیر لاوروف په همدې ورځ د فلسطين او اسرائيل ترمنځ د شخړو په اړه له خپل ایراني سيال عبدالهيان سره ټليفوني خبرې وکړې. دواړو خواوو په غزه کې روانې شخړې ته پاملرنه او اندېښنه وښودله او زياته يې کړې ، چې باید ژر تر ژره اوربند تر سره شي او ځپلو خلکو ته بېړنۍ مرستې برابره شي.
د فرانسې ولسمشر ماکرون د نومبر په ۱۹مه نېټه په ټولنيزو رسنيو کې ويلي، چې په غزه کې بشري حالت ډېر سخت دی او له فلسطين او اسرائيل څخه يې غوښتنه کړې، چې سمدلاسه جنګ بند کړي او اوربند وکړي. په همدې ورځ د فرانسې ۳۶۰۰ تنو کلتوري شخصيتونو په پاريس کې لاريون وکړ او پر فلسطين او اسرائيل يې غږ وکړ، چې سیاسي ډيالوګ تر سره کړي او له زورزياتي سره دې مخالفت وکړي.