د ځينو لوېديځو هېوادونو سیاستوالو او رسنیو په دې وروستیو کې د چین د اضافي تولیدي وړتیا په اړه پر له پسې ګونګوسې راپورته کړې، دوی حتی د برقي موټرونو په شمول د نوې انرژۍ برخو کې په چین پسې دا تړلې چې د اضافي تولیدي وړتیا په کارولو سره تولیدات په ټيټه بیه نورو هېوادونو ته ډېر صادروي او ځايي چارو ته زیان رسوي.
د اضافي تولیدي وړتیا معنا دا ده، چې تولیدي توان پر بازاري تقاضا ډېر زیات دی. خو د نړیوالې انرژۍ ادارې شمېرې ښيي، تر ۲۰۳۰ کال پورې به په ګردې نړۍ کې د نوې انرژۍ موټرونو تقاضا ۴۵ میلیونو ته او د لمریزو جنراتورونو نوې تقاضا به ۸۲۰ جي واټو ته ورسېږي. د نړۍ اوسنی توليدي توان د دغې تقاضا د پوره کولو لپاره لرې واټن لري، ډېر پرمختیايي هېوادونه د نوې انرژۍ تولیداتو ته زیاتې اړتیاوې لري، نو د نوې انرژۍ په برخه کې د چین تولیدي توان بیخي اضافي نه دی.
بله خوا، په بهرنیو بازارونو کې د چین د برقي موټرونو په شمول د تولیداتو بیې د کورني بازار په نسبت لوړې دي، خو لا هم ډېر هرکلی یې کېږي. له دې ښکاري، چې د چین د اړوندو چارو د سیالۍ وړتیا د نړیوالې بازاري تقاضا او د چیني تصدیو موثریت په شمول د ګډو عواملو لخوا ټاکل شوې ده.
د نړیوال وجهي سازمان او د نړیوال بانک په پسرلنۍ غونډه کې چې تازه په واشنګټن کې پای ته ورسېده، ډېرو اقتصادي کارپوهانو او مسلکي شخصیتونو ویلي، چې د چین د اضافي تولیدي وړتیا په اړه نظریه د پوهېدو وړ نه ده.
د امریکې د پیترسون اقتصادي څېړنیز انستيټیوټ جګپوړي څېړونکي نیکولاس لاډي د یادې نظریې تر شا د نړیوال کېدو تمایل د مخنیوي او د سوداګرۍ ساتنې په اړه اندېښنه څرګنده کړه. هغه وویل، ایا دا نظریه معقوله دهچې کوم یو هېواد پر خپل خرڅلا وتوان زیات تولیدات نه شي تولیدوي؟ نو آیا د امریکې د بو ینګ الوتکې شرکت باید تولیدي اندازه کمه کړي؟ د امریکې د سویابینو تولیدي فارمونه ایا باید خپله تولیدي اندازه کمه کړي؟
په حقیقت کې امریکا هغه هېواد دی، چې په ټیټه بیه یې نورو هېوادونو ته ګڼ شمېر تولیدات صادر کړي او کوي یې. د مثال په توګه، امریکې د خپلې تولیدي وړتیا په کارولو سره له اوږدې مودې راهیسې نورو ته ګڼ شمېر سویابین صادر کړي او هڅه یې کړې چې د نورو هېوادونو په بازارونو کې لارښوونکی مقام ونیسي. سربیره پر دې، دغه عمل سیاسي رنګ هم لري، هغې څو ځلې د غلودانو زورواکۍ په پار په نړۍ کې د غلودانو بحران راپورته کړی او پر نورو فشارونه اچولي، څو دوی مجبورا د امریکې وسیله وګرځي.
خو د چین د نوې انرژۍ تولیداتو صادرات نورو ته واقعي ګټې رسولي دی.
د بریتانیې د Grant Thornton International Ltd ګرند تورنتون نړیوال لتد انستیتیوټ مسئول وویل، د نوې انرژۍ په برخه کې د چین تولیدات نړیوال بازار ته ډېر ګټور فرصت برابر کړی دی. که په دغه برخه کې د چیني تولیداتو پر صادراتو محدودیت وضع شي، نو د بریتانیې مشتریان به د چین د تخنیک له پرمختګ څخه ګټه نه شي اخیستلی.
د برومبورګ اژانس د څېړنې پایله ښيي، د برقي موټر په برخه کې، د چین د زیاتره مخکښو صادرونکو شرکتونو تولیدي توان د کارونې اندازه له نړیوال میعار سره سمون لري. اوس د امریکې او اروپا پر وړاندې ستونزې دا دي، چې د شرکتونو موثریت یې د چیني تصدیو په نسبت کمزوری دی.
د جاپان د موټري چارو کارپوه تانزینګ په ډاګه کړې، چې ځینو لوېديځو هېوادونو پر چین پسې د اضافي تولیدي وړتیا خبره تړلې، د دوی موخه دا ده، چې د شخصي ګټو ساتلو لپاره د چین د پرمختګ مخنیوی وکړي او د خپلو تصدیو لپاره ګټور مقام ونیسي.
نو د چین د اضافي تولیدي وړتیا په اړه تورونه بیخي بېځایه دي، دا یوازې د خپلو ګټو ساتلو لپاره د لوېديځو هېوادونو ګانګوسې دي.