د چین د دولت رئيس شي جين پينګ د روان کال په جنورۍ کې د چين او فرانسې ترمنځ د ډيپلوماتيکو اړيکو د ټينګېدو د شپېتمې کاليزې د نمانځنې په مناسبت ويډيويي وينا کې د دواړو هېوادونو ترمنځ د راتلونکو اړيکو د يادونې په اړه ويلي چې په نوې زمانه کې د نړیوالو بدلونونو په حال کې چين او فرانسه باید د دوه اړخيزو اړيکو پر اصلي موخې ټينګار وکړي او په راتلونکي پرمختګ کې دې لا مثبتې همکارۍ وکړي.
په وروستيو کلونو کې د مشرانو تر ډيپلوماتيکې لارښوونې لاندې د چين او فرانسې ترمنځ همکارۍ ډېرې لاسته راوړنې درلودلې چې همدا د دوه اړخيزو اړيکو د پرمختګ خوځښت او د دواړو هېوادونو د ګډ پرمختګ نوي فرصتونه راوړي او د خلکو لپاره يې نوې ګټې موندلې دي.
د چین د سوداګرۍ د وزارت د شمېرنې له مخې د روان کال په لومړيو دوو مياشتو کې په چين کې د فرانسې مستقيمې پانګونې د تېر کال د همدې مودې په پرتله په سلو کې ۵۸۵ اعشاريه ۸ زياتې شوې دي. د دې وزارت د نړيوالې سوداګرۍ د اقتصادي همکارۍ د څېړنيز انسټيټيوټ د اروپايي چارو د څېړنيز مرکز مشر ياو لينګ په وروستيو کې رسنيو ته ويلي چې په وروستيو کلونو کې په چين کې د فرانسوي پانګوالو مستقيمې پانګونې په پر له پسې توګه زياتې شوې چې پانګه يې د اروپايي ټولنې له نورو هېوادونو څخه مخکې مقام نيولی دی.
د تېر کال په اپرېل کې د چین د دولت رئيس شي جين پینګ د چين او فرانسې د صنعتګرو کمېټې د پنځمې غونډې د پای په مراسمو کې وويل چې د ستونزو او ننګونو پر وړاندې چين او فرانسې پر واقعي څو اړخيزم، ازادې سوداګرۍ او د اقتصاد د نړيوال کېدو پر سم لوري ټينګار کړی چې د دوه اړخيزې سوداګريزې همکارۍ خوځنده ځواک لا پياوړی شوی دی. هغه په خپلې وينا کې دې ته اشاره کړې چې د چین او فرانسې ترمنځ اقتصادي او سوداګريزې همکارۍ نه يوازې د دواړو هېوادونو د اقتصادي پرمختګ او د خلکو د نيکمرغه ژوند په ګټه دي بلکې له دې کبله يې پر نړیوال اقتصادي سمسورتيا د خلکو باور لا ټينګ کړی او اټکل شوې موخه لا ډاډمنه شوې ده.
د سچنيدار په نوم د فرانسې شرکت د عمومي مدير مرستيالې باربرا فرې رسنيو ته ويلي چې شرکت يې په پر له پسې توګه په چين کې پانګه کړې چې لامل يې د چين پر راتلونکي بازاري پرمختګ پوره باور دی. هغې زياته کړې چې اوس چين لا غښتلی اقتصاد ګرځېدلی او چیني بازار له خوځنده ځواک څخه ډک دی چې د ننګونو د موجوديت ترڅنګ ډېر فرصتونه هم شته دي. په اسيا او ارام سمندر کې د فرانسې د برېښنا ګروپ د بيا کارېدونکې انرژۍ شرکت د عمومي مدير مرستيال پاتريک سارينيون وويل چې د چين د ټيټ کاربون لرونکو انرژيو جنراتورونو ظرفيت په نړۍ کې لوړ مقام نيولی دی. د چين حکومت تل د انرژۍ په برخه کې زموږ له پانګونو څخه ملاتړ کړی او غوره تدارکاتي ځنځيرونه د تجهيزاتو په برخه کې زموږ ټولې اړتياوې پوره کولی شي.
د چين او فرانسې ترمنځ اقتصادي او سوداګريزې همکارۍ د ګډو ګټو پر بنسټ د ګډو برياليتوبونو پر اصولو په ټينګار سره لا پرمختګ موندلی دی. په ۲۰۲۳ م کال کې دوه اړخيز سوداګريز ارزښت ۷۸ ميليارډه او ۹۰۰ مليونه امريکايي ډالرو ته رسېدلی چې له دې امله فرانسه په اروپايي ټولنه کې د چين درېيم سوداګريز همکار ګرځېدلی او چين په اسيا کې د فرانسې لومړی لوی سوداګريز همکار دی.
د فرانسې ولسمشر ايمانويل مکرون تېر کال له چين څخه د ليدنې په ترڅ کې له چيني لوري سره تړون لاسليک کړی چې له مخې يې ((له فرانسوي فارمونو څخه د چين د ډوډۍ خوړلو تر ميزونو پورې )) بشپړ همکاريز ميکانيزم جوړ شوی دی. اوس دغه ميکانيزم هم د دواړو هېوادونو ترمنځ د همکاريو نمونه ګرځېدلې ده.
د فرانسې د مالدارۍ او غوښو ټولنې د بهرنۍ سوداګرۍ کمېټې رئيس مارکوس بيګال وويل چې د ياد تړون په لاسلیک سره به لا زيات غوره فرانسوي غوښې چيني بازار ته داخلې شي.
اوس د چیني شکله عصري کېدو بهير نوي پړاو ته ننوتلی دی او فرانسې هم د بيا صنعتي کېدو د پرمخ بېولو لپاره هڅې کړې دي. موږ دې ته په تمه يو چې په راتلونکو شپېتو کلونو کې به چين او فرانسه د همکاريو له لارې د خلکو د لا نيکمرغه ژوند لپاره لازياتې ګټې راوړي او د نړيوالې سمسورتيا او پرمختګ لپاره به نوي خدمتونه زيات کړي.