د چین او اروپا ترمنځ ۹۰ زرم منظم اورګاډی د تېرې مې میاشتې په ۲۵مې نېټې د چین له شي ان ښار څخه د اروپا په لور وخوځېد او په ۲۸مې نېټې د شينجيانګ د قورغاس ځمکني بندر څخه تېر شو او اټکل کېږي، چې د جون په ۱۰مې به د پولنډ ملازویز ښار ته ورسېږي.
د شي ان ځمکني بندر له لارې د چین او اروپا د منظمو اورګاډیو د تګ راتګ اندازه د هېواد د نورو بندرو په پرتله زياته ده او شمېرې ښيي، چې تېر کال له دغه ځمکني بندر څخه څه باندې ۵ زره اورګاډي د اروپا په لوري خوځېدلي دي.
په دې وروستیو کلونو کې د چین د نوې او لوړې ټکنالوژۍ، نوې انرژۍ او لوړ اضافي ارزښت ډېری تولیدات د یادو منظمو اورګاډیو له لارې اروپايي هېوادونو ته صادر شوي دي.
مالومات ښيي، په هر يو منظم اورګاډي کې، چې د شي ان ښار له ځمکني بندر څخه د اروپا په لوري حرکت کوي، ۲۶۱ موټرونه بار وي او هره میاشت کابو له ۳ تر ۴ زرو د نوې انرژۍ موټرونه صادروي او په ورته وخت کې ځيرک ماشینونه هم د یادو منظمو اورګاډو له لارې اروپا ته صادرېږي.
د شي ان یوه فابریکه هر کال شاوخوا سل زره د لوښو مینځلو ماشینونه تولیدوي او ۸۰ سلنه یې د جرمني، فرانسې او ایټالیې په شمول اروپايي هېوادونو ته صادريږي. دغه فابریکه خپل تولیدات د منظم اورګاډي له لارې صادروي او د حمل و نقل کلنی لګښت یې یو پر درېيمه برخه کم شوی دی.
شینجیانګ، د کمربند او لارې یو مهم محور دی، د چین او اروپا د منظمو اورګاډيو د ګړندي پرمختګ په مټ یې له اسیا او اروپا سره د تګ راتګ نړیواله لویه لاره هواره کړې او د ارومچي او قورغاس ښارونه یې د ورخلاصون کړکۍ ګرځېدلي دي.
ارومچي ښار مخکې د چین او اروپا د منظمو اورګاډو پر لارې د دمې او تنظیم یو سټېشن و، خو اوس دغه ښار يو نړیوال ځمکنی بندر ګرځېدلی او د توکو د راټولېدو او ځايولو توان او خدمتي موثریت یې پر له پسې لوړ شوی دی.
د بېلا بېلو سیمو د مشتریانو زيات توکي اوس د ارومچي نړيوال ځمکني بندر کې راټوليږي او بيا ترې کانټينرونه ډکيږي او په اورګاډو کې په منظم ډول اروپايي هېوادونو ته ليږدول کيږي. سربیره پر دې، د اورمچي او قورغاس ځمکنيو بندرونو د ډیجټلي ډګرونو په جوړولو سره د مشتریانو لپاره نور ښه خدمتونه هم وړاندې کوي.
له اورمچي ښار څخه د منظمو اورګاډیو د کرښو شمېر ۲۱ ته رسېدلی او د ۱۹ هېوادونو ۲۶ ښارونو ته یې پټلۍ غځېدلې دي.
د قورغاس ځمکني بندر له لارې د تېرېدونکو منظمو اورګاډو د کرښو شمېر ۸۲ ته رسېدلی او د ۱۸ هېوادونو له ۴۶ ښارونو او سیمو سره تګ راتګ کوي. ارومچي او قورغاس د توکو د صادراتو او وارداتو طلايي لارې ګرځېدلې دي.
د چین او اروپا منظمو اورګاډيو کې نه يوازې نورو هېوادونو ته توکي ليږدول کيږي، بلکې له نورو ځايونو هم چين ته واردات لري. د شي ان ښار په لویو سوپرماکیټونو او د قورغاس له ماليې معافو سیمو او دوکانونو کې، د فرانسې د ښکلا او سینګار توکو، ترکي بسکېټو، قزاقستاني غنمو، د روسیې د جوسو په شمول ډول ډول تولیدات پيدا کيږي او ډېر مشتريان يې راجلب کړي دي.
د چین او اروپا منظم اورګاډي په ۲۰۱۳ کال کې فعال شوي او په نوې زمانې کې د کمربند او لارې د پولادي کاروان په شان رول لوبوي او تراوسه له ۹۰ زرو څخه زياتو اورګاډیو د دواړو لوريو ترمنځ تګ راتګ کړی او ۸،۷ میلیونه کانټینرونه يې ليږدولي، چې عمومي ارزښت یې له ۳۸۰ میلیارډو ډالرو څخه زیات ښودل شوی دی.
د چین او اروپا منظمو اورګاډيو د اسیا او اروپا ترمنځ د سوداګریز تګ راتګ او د چین د دوامدار ورخلاصون د پیاوړتیا لپاره حیاتي ځواک برابر کړی دی.