د «نويو باکيفيته توليدي ځواکونو» اصطلاح له رامنځته کېدو سره سم د نړۍ پام ور اړولی دی. دا به د حيرانتيا خبره نه وي که وپوښتل شي چې د چين نوي باکيفيته توليدي ځواکونه به نورې نړۍ ته څه مانا ولري؟ حقايق تر ټولو غوره ځوابونه دي.

د سعودي عربستان د ارامکو شرکت اجرايوي رييس د انرژۍ په نړيوال کانګريس کې وويل چې چين د لمريزې انرژۍ د لګښتونو په کمولو کې ډيره مرسته وکړه، «ځکه چې چين د زرغونې انرژۍ دغه محصولات په ډير لږ لګښت توليدوي. دوی به له لويديځ سره مرسته وکړي چې تر ۲۰۵۰ کال پورې د کاربن د خپراوي کچې د صفر کولو موخې ته ورسيږي». په داسې مهال چې متحد ايالتونه د زرغونې انرژۍ محصولاتو لپاره د چين د «بې حده لوړ توليدي ظرفيت» تش په نوم ادعاوو ته زور ورکوي، د ناصر خبرې د نړيوالې ټولنې عيني او منطقي ليدلوری منعکسوي. مانا دا چې د چين د نويو باکيفيته توليدي ځواکونو د يوې برخې په توګه بايد د زرغونې انرژۍ د صنعت پراختيا يو ښه خبر وي، ځکه پرمختللي هېوادونه د کاربن د خپراوي په راکمولو او ګڼ شمېر نور د انرژۍ د نړيوال ليږد په برخه کې ترې کار اخيستی شي.

د نويو توليدي ځواکونو تر شا نوې ټکنالوژي او نوې نظريې ولاړې دي. د چين له نويو توليدي ځواکونو څخه به نه يوازې د ګلخانه یي ګازونو لويو توليدوونکو هېوادونو ته ګټه ورسيږي، بلکې نورې نړۍ ته به هم د پام وړ ګټه وکړي، ځکه چين نويو توليدي ځواکونو ته انکشاف ورکوي او نړيوالې ټکنالوژيکي همکارۍ پراخيدلی شي.

په مصر کې، د چين له لوري مرسته شوې سپوږمکۍ (EgyptSat-2)  د کرنې، ځنګلونو، پر چاپيريالي افتونو د نظارت، ښاري رغنيزو چارو او ګڼو نورو برخو کې مهم خدمت کړی دی. په متحدو عربي اماراتو کې د کمربند او لارې وړاندیز په چوکاټ کې چيني کمپنيو، په ځانګړي ډول د ټکنالوژۍ په برخه کې نوښتګرو شرکتونو د ځيرکو ښارونو، پاکې ټکنالوژۍ، پرمختللو توليداتو او ورته نورو برخو کې له ځايي پراختيا سره د پام وړ مرسته کړې ده.

په ۲۰۲۳ کال کې د چين د «درې ګونو» محصولاتو، لکه برېښنايي موټرو، لېتيم – يوني بېټريو او د لمريزې برېښنا د تجهيزاتو په صادراتو کې ۳۰ سلنه زياتوالی راغلی چې په اوږدمهال کې به له نورو هېوادونو سره مرسته وکړي څو خپل توليدي ځواک لا ډيرو لوړو پوړيو ته ورسوي.

احصائيې هم ښيي چې د چين نويو باکيفيته توليدي ځواکونو د نړۍ له اقتصادي ودې سره مرسته کړې ده. بلومبرګ په وروستيو کې په يوه راپور کې ويلي چې د چين له لوري وړاندې کېدونکو د زرغونې انرژۍ ارزان بيه محصولاتو د انرژۍ د نړيوال لېږد هيله پوره کېدو ته نږدې کړې ده.

دا مهال، چين د نړۍ د اړتيا وړ د بادي برېښنا ۵۰ سلنه تجهيزات او د لمريزې برېښنا ۸۰ سلنه تجهيزات توليدي.

له ۲۰۱۲ کال څخه تر ۲۰۲۱ کال پورې د چين زرغونې سوداګرۍ ۱۴۶.۳ سلنه وده کړې او نړيوالې اقتصادي ودې ته یې زرغونه انګيزه ورکړې ده. له ۲۰۱۱ کال څخه تر ۲۰۲۱ کال پورې په چين کې د چاپيريالي ټکنالوژۍ په برخو کې د اختراعاتو د ثبت عريضې د ټولې نړۍ د ثبت شويو عريضو ۶۰ سلنه وې. دغه راز چين د چاپيريالي ټکنالوژيو د کارولو په برخه کې د نړۍ تر ټولو چټک هېواد دي.

د يادونې وړ ده چې د انرژۍ د ليږد لپاره د ټکنالوژۍ پرمختګ اړين دی. ګڼ شمېر هېوادونه د زرغونې انرژۍ د پراختيا په برخه کې د ټکنالوژۍ د وروسته پاتې والي او د نويو او پخوانيو ټکنالوژيو د نه يو لاس کېدو په څېر خنډونو سره مخ دي. چين به وکولی شي چې د نويو باکيفيته توليدي ځواکونو پر مټ دې ستونزو ته له نوښتونو ډکې حل لارې وړاندې کړي، پر دې اساس به په ټوله نړۍ کې د ټکنالوژۍ او صنعت پرمختګ ته لاره هواره شي.

په حقيقت کې، په تر ټولو زرغونه بڼه پراختيا د نويو باکيفيته توليدي ځواکونو د روزلو لپاره د چين تر ټولو لوی دليل دی چې د لږ لګښت، لږ کاربن خپروونکي او له چاپېريال سره د جوړ انکشاف ملاتړ او د خلکو د خوښۍ، د ټولنې د روغتيا او سلامتيا او د نړۍ د باثباته راتلونکې ضمانت کوي.

د ټکنالوژۍ په برخه کې په نوښتونو او يوه بشپړ صنعتي ځنځيري سيسټم سره د چين نوي با کيفیته توليدي ځواکونه د زرغونې انرژۍ محصولات لا ډير مشهورولی او په نړيواله کچه د ټيټې بیې حل لارې رامنځته کولی شي. دا چاره په ورته مهال د دوديزې انرژۍ د لوړيدونکو بيو له کبله د رامنځته کيدونکي انفلاسيوني فشار په کمولو کې هم مرسته کولی شي. د مکينزي او کمپنۍ (McKinsey & Company) د معلوماتو پر بنسټ د چين بريښنايي موټر د اروپا د بريښنايي موټرو په پرتله له ۲۰ تر ۳۰ سلنې ارزانه دي. دا زموږ د ادعا ثبوت دي.