د چين په ملي موزيم کې د ۱۰۹ رسمي مهرونو يوه ځانګړې ټولګه موجوده ده. دا مهرونه چې د تيانجين ښاروالۍ د بېنهای د نوې سيمې اړوند دي. په ۲۰۱۴ کال کې د ځايي حکومت له لوري د پلټنې د يوې ادارې تر رامنځته کېدو او اداري ازمويښتونو وروسته د پلټنو او تاييدۍ سلګونه واحدونه سره مدغم او پخواني مهرونه یې پر واحد رسمي مهر بدل شول.
په ۲۰۱۴ کال کې، سره له دې چې د سوسياليستي اقتصاد د بازار طرحه دوې لسيزې پخوا وړاندې شوې وه، سوداګري لا هم له ننګونو سره مخ چاره وه. د تيانجين ښاروالۍ د ولسي کانګريس يوه قانون جوړوونکي څرګنده کړه چې د پانګونې يوه پروژه، د ځمکې له ترلاسه کولو بیا د ټولو اداري پروسيجرونو تر بشپړېدو پورې تر ۳۰ ډيرو دولتي منظوريو او تر ۱۰۰ ډيرو مهرونو ته اړتيا لري. د هغه په خبره دا ټوله پروسه لږ تر لږه ۲۷۲ کاري ورځې وخت نيسي.
د چين په ملي موزيم کې نندارې ته اېښودل شوي مهرونه ژورو اداري اصلاحاتو ته د چين د عزم څرګندونه کوي. د تېرو څو کلونو په ترڅ کې د کاروبار د اسانچارۍ په موخه د چين دولتي شورا د څه باندې سلو مواردو د اداري منظورۍ واک له منځه وړی او یا یې د ټيټې کچې مسوولينو ته لېږدولی او د پانګونې پر مواردو یې د مرکزي حکومت د منظورۍ واک ۹۰ سلنه راکم کړی دی.
چين په ۱۹۷۸ کال کې اصلاحات او ور خلاصون پيل کړي دي.
په تېرو ۴۶ کلونو کې چين له يوه بېوزلي او وروسته پاتې هېواد څخه د نړۍ پر
دويم لوی اقتصادي ځواک بدل شوی دی.
د چين د ولسي جمهوريت رييس شي جين پينګ په ۲۰۲۳ کال کې په يوه سمپوزيم کې وويل چې اصلاحات او ورخلاصون له وخت سره د چين د ځان عيارولو ستر دليل دی. هغه زياته کړه چې د چين د عصريتوب د پرمخ بېولو لپاره بايد هراړخيز ژور اصلاحات رامنځته شي، ټولنيز توليدي ځواکونه په دوامداره توګه ازاد او ټولنيزه تازګي رامنځته شي.
د چين د کمونيست ګوند د شلمې مرکزي کمېټې درېيمه عمومي غونډه د دوشنبې په ورځ په بېجينګ کې پيل شوه. په دې غونډه کې د هر اړخيزو اصلاحاتو د ژورولو او د چين د عصريتوب پرمخ بېولو باندې تمرکز کيږي.
د چين د ټولنيزو علومو اکاډمۍ يو څېړونکی وانګ چونګوانګ وايي چې چين اوس د اصلاحاتو په بهير کې د ژورو اوبو سيمې ته ننوتی دی چې د پخوا په پرتله له ډيرو بېړنيو او مغلقو مسايلو لکه د پخوانيو اصلاحاتو د اغېز له کمښت، د راتلونکو اصلاحاتو له ناڅرګند مسير او د نړيوالو اړيکو له بدلون سره مخ دی. د اصلاحاتو له لارې په ټولنه، اقتصاد، کلتور او سياست کې د شته ننګونو له هواري پرته به د چين عصريتوب د پام وړ محدود وي.
د وهان پوهنتون يوه مرستيال استاد فن ويچېنګ ويلي، په داسې حال کې چې د ساينس او ټکنالوژۍ انقلاب او د نړۍ په کچه په صنايعو کې ژور بدلون واقع کېدونکي او د ساينس او ټکنالوژۍ سيالۍ پراخې شوې دي، د ژورو اصلاحاتو راوستل د چين د ټکنالوژيکي نوښتونو لپاره حياتي ارزښت او د هېواد په راتلونکې کې پرېکنده رول لري. رييس شي وويل چې د چين د راتلونکې پراختيا پر وړاندې د پرتو يو لړ خنډونو او تضادونو د هوارې لپاره بايد ژور اصلاحات او ورخلاصون رامنځته شي. هغه د ژورو اصلاحاتو پر اهميت ټينګار وکړ. يو کال تر هغې وروسته چې نوموړی په ۲۰۱۲ کال کې د چين د کمونيست ګوند د مرکزي کمېټې عمومي منشي وټاکل شو مرکزي حکومت د هراړخيزو ژورو اصلاحاتو د راوستلو پرېکړه وکړه څو د چيني ځانګړتيا لرونکی سوسياليستي سيستم او د چين د حکومتولۍ سيستم او ظرفيت تقويه شي.
چين څه ډول ژور اصلاحات راولي؟
له هغه وخت راهيسې د چين رهبرۍ د هراړخيزو ژورو اصلاحاتو لپاره يوه تګلاره جوړه کړه او دغه راز یې تر ۳۰۰۰ ډير اصلاحي پلانونه جوړ کړل چې د ګوند او حکومت اداري اصلاحات، د کليوالي سيمو اصلاحات، د حکومت تر ملکيت لاندې د کاروبار اصلاحات، مالي اصلاحات، زرغون بدلون او د روغتيايي سيستم اصلاحات په لمن کې رانغاړي.
د دوی په منځ کې بيا پر اقتصادي اصلاحاتو ځانګړی تمرکز کيږي. رييس شي غواړي چې بازار بايد د سرچينو په تخصيص کې ټاکونکی رول ولوبوي. دا د پاليسو د بدلون پياوړې نښه ده ځکه چې په مخکني بيان کې د «ټاکونکی» کلمې کارونه يو «بنسټ» و.
د رييس شي د لارښوونې پر بنسټ چين د خصوصي اقتصاد د پراختيا يوه بيورو رامنځته کړه څو له خصوصي کاروبار سره مرسته وکړي، مالي ملاتړ ته د خصوصي کاروبار د لاسرسی د اسانتيا په موخه مالي اصلاحات رامنځته کړي، د عصري کاروباري سيسټمونو د لا ډيرې ودې لپاره د دولت ملکيت کاروبار اصلاح کړي او مارکيټ ته د لاسرسي لپاره د منفي نوملړ سيستم پلی کړي، څو هغه سيمو ته د داخليدو اجازه ترلاسه شي چې د نوملړ له مخې په څرګنده هلته ننوتل منعه شوي نه وي.
د اصلاحاتو پایلې د پام وړ دي. د (۲۰۲۰-۲۰۲۲) درې کلن عملياتي پلان له مخې د دولت تر ملکيت لاندې ۱۶۵ زره کاروبار پر محدودالمسووليت يا د محدودو ونډو پر کمپنيو بدل شوي او شاوخوا ۳۸ زرو نورو کاروبارونو ته مديره پلاوي ټاکل شوي دي. له ۲۰۱۲ کال څخه تر ۲۰۲۳ کال پورې په چين کې د خصوصي کاروبارونو شمېر له څلور چنده ډير شوی او د ټولو شرکتو پر وړاندې د خصوصي شرکتونو نسبت له څه کم ۸۰ سلنې څخه څه باندې ۹۲ سلنې ته رسېدلی دی.
د نړيوال بانک په يوه راپور کې چې په ۲۰۲۰ کال کې خپور شوی و راغلي وو چې په چين کې د دوامدارو او پياوړو اصلاحاتو له کبله سوداګريز چاپېريال د پام وړ ښه شوی او دغه هېواد د دوو کلونو لپاره په پرله پسې ډول د نړۍ د لسو غوره اصلاح کوونکو په کتار کې راغلی دی.