د چين د کمونيست ګوند د شلمې مرکزي کمېټې درېيمه عمومي غونډه په وروستيو کې د چيني عصريتوب د پرمخ بېولو لپاره په جامع توګه د اصلاحاتو د ژورولو په پرېکړې سره پای ته ورسېده. د پنجشنبې پر ورځ د خپرې شوې بيانيې له مخې، چين د عصريتوب له لارې د ملي تازه ګۍ او لوی ملت د جوړولو يوه ډير مهم پړاو ته ننوتی دی.
په بيانيه کې د اصلاحاتو او ور خلاصون پر اهميت ټينګار شوی او پکې زياته شوې: «چيني عصريتوب په دوامداره توګه د اصلاحاتو او ورخلاصون له لارې د پرمختګ په حال کې دی او د لا ډيرو ژورو اصلاحاتو او ور خلاصون له لارې به له شک پرته لوړو افقونو ته ورسيږي. موږ بايد په موخيز ډول لا ډيرو اصلاحاتو ته اهميت ورکړو او اصلاحات په هر اړخيزه توګه ژور کړو څو وکولی شو چې په کور د ننه او نړيواله کچه له پېچلو پرمختګونو سره مقابله وکړو، له علمي او تکنالوژيکي انقلاب او صنعتي بدلونونو سره ځان عيار کړو او د خپلو ولسونو توقعات پوره کړو».
چيني عصريتوب له پرانيستې سره
په وروستيو کلونو کې چين په ډيريدونکي شمېر سره بهرنيو سيلانيانو ته هرکلی ويلی دی، دا کار یې د ويزو د معافيت سياست له برکته کړی دی. چين ته ورغلو سيلانيانو د خپل سفر تجربې پر خواله رسنيو خپرې کړې دي، د بيجينګ په ليانګماهې سيمې کې يې د شپني ژوند رنګونه خوندي کړي، د شانګهای د سړک د سر له خوړو یې خوندونه اخيستي، په شين جين ښار کې یې د ډرون په وسيله خواړه ترلاسه کړي او په ووهان ښار کې یې د کوچنيو ريلونو د پرمختللي ترانزيټي سيسټم او خپلکاري ټکسي سپرلۍ کړې دي. دا سنپ شاټونه د چين د متحرکې فضا، پرانيستې او دغه راز د چين د خلکو د اعتماد نښې دي.
ور خلاصون ته ژمنتيا، د سيلانيانو د خوښې وړ منزل په توګه د چين د جذابيت بنسټ دی. لکه څرنګه چې په بيانيه کې هم راغلي: «ور خلاصون د چين د عصريتوب تعريفوونکې ځانګړنه ده. موږ بايد د بهرنۍ نړۍ پر مخ د ورخلاصون په اړه د دولت بنيادي سياست ته ژمنتيا وساتو، څو د ور خلاصون له لارې اصلاحاتو ته وده ورکړل شي. د چين د لوی بازار له امتيازه په استفادې سره به موږ دا کار ترسره کړو. د ورخلاصون په تړاو به په داسې حال کې خپل ظرفيتونه لوړ کړو چې له نورو هېوادونو سره خپلې اړيکې پراخوو او د لوړ معيار پرانيستي اقتصاد لپاره نوې ادارې رامنځته کوو».
د پڅې نړيوالې اقتصادي ودې او پروټېکشنيزم په ترڅ کې د چين پرانيستې پراختيا د نړيوال عامه توکي په توګه مطرح ده. د کمربند او لارې وړاندیز د چين د نړيوالو همکاريو د کليدي توکي په توګه په ونډه والو هېوادونو کې د خلکو او توکو لېږد را لېږد اسانه کړی او د پام وړ ګټې یې رسولې دي. چين له ۱۵۰ ډېرو هېوادونو او ۳۰ نړيوالو سازمانونو سره د کمربند او لارې نوښت هوکړه ليکونه لاسليک کړي دي. په ۲۰۲۳ کال کې د کمربند او لارې نوښت له هېوادونو سره د چين د توکو سوداګري ۱۹.۵ ټريليونو يوانو يا ۲.۶۸ ميلياردو ډالرو ته رسېدلې وه. دا شمېرې ۲.۸ سلنه وده ښيي او د ياد هېواد د ټولو کلنيو صادراتو او وارداتو ۴۶.۶ سلنه برخه جوړوي.
په بيانيه کې د پرانيستې پر اهميت په ټينګار سره د کمربند او لارې وړانديز په چوکاټ کې د لوړ کيفيت پر همکاريو هم ټينګار شوی څو د وړاندیز له ونډه والو هېوادونو سره مرسته وشي چې د نړيوال کېدو ضد جريانونو سره په مبارزه کې بريالي شي او عامه پرانيستې پراختيا ته لاسرسی ومومي.
چيني عصريتوب له سوله ییزې پراختيا سره
د ګيانا بيساو ولسمشر اومارو سيسکو ايمبالو چين ته په خپل وروستي رسمي سفر کې دغه هېواد په استعماري فعاليتونو کې نه د ښکېلتيا، د نورو هېوادونو په کورنيو چارو کې د نه لاسوهنې او له کوچنيو هېوادونو سره د محترمانه چلند له کبله وستايه. هغه زياته کړه چې د چين د همکاريو پروژو لکه ښوونځيو، روغتونونو او سړکونو په افريقا کې خلکو ته د پام وړ ګټه رسولې ده.
چيني عصريتوب د لويديځ له تعرض محوره عصريتوب سره په تضاد کې دی. د چين سوله ييزه او پرانیستې پراختيا ثبات، اطمينان او د بشري عصريتوب لپاره نوې هيلې وړاندې کوي. په بيانيه کې ويل شوي: «چيني عصريتوب د سوله ييزې پراختيا عصریتوب دی». د نړۍ د لويو هېوادونو له منځه، چين د سولې د اوږده تاريخ د لرلو له کبله ځانګړی دی چې دا چاره یې له ملي هويت سره غوټه شوې ده. یوازې سوله ييزې پراختيا ته د پابندۍ له لارې متقابل ګټور او پرانيستی نړيوال پراختيايي سيسټم رامنځته کېدای شي.
د ملګرو ملتونو عمومي منشي انتونيو ګوتريش د روان کال په جولای کې د چين د ولسي جمهوريت له رييس شي جين پينګ سره په کتنه کې له ملګرو ملتونو د ملاتړ، څو اړخيزتوب ته د ژمنتيا او د نړيوالې سولې او پراختيا د تقويه کولو په برخه کې د رغنده رول لوبولو له کبله د چين مننه وکړه. هغه وويل چې د بشريت راتلونکې په لويه کچه پر چين تکيه ده.
چيني عصريتوب د خپلواکۍ، پر ځان د تکیې او پراختيا د اصولو پر بنسټ او د خپلو خلکو د سخت کار او نوښتونو له لارې د ځان د پياوړي کولو له لارې پر مخ بېول کيږي. کورنۍ انګيزه د بهرنيو سرچينو له سوله ييزې کارونې سره داسې يو ځای کوي چې ملي پراختيا ته پرته له دې چې پر نورو هېوادونو ظلم او يا یې سرچينې ولوټل شي زمينه برابره شي. چيني عصريتوب په خپل ظرفيت سره نورو مخ پر ودې هېوادونو ته مرسته او ملاتړ برابروي.
چيني عصريتوب د بشريت د راتلونکې پراختيا لپاره له مسووليتونو سره
په تېره پېړۍ کې دوې نړيوالې جګړې او يوه سړه جګړه وشوه چې بشريت یې پر دوو مخالفو بلاکونو وويشه او د اټومي جګړې له دايمي ګواښ سره یې مخ کړ. تر سړې جګړې وروسته د لويديځ پراختيايي ماډل په نړيواله کچه تقويه شو او په پايله کې يې ډيرو مخ پر ودې هېوادونو د سياسي فشارونو له کبله لويديځ سيسټمونه، ارزښتونه او نيولېبرال نظريات خپل کړل او په دې توګه یې پر خپل پراختيايي بهير کنټرول له لاسه ورکړ.
د سولې او پراختيا لپاره د چين هڅې د عصريتوب لپاره د مخ پر ودې هېوادونو له هيلو سره همغږې دي. د چين نوښتونه او وړاندیزونه په انساني ارزښتونو کې د پام وړ پرمختګ ښکارندوی دي، بريالۍ پراختيا یې د بشري ودې پر وړاندې د مسووليت منلو نښه ده او د پراختيا لپاره نوی مسير وړاندې کوي.
د چين د کمونېست ګوند د شلمې مرکزي کمېټې درېيمې عمومي غونډې د خپلواک سوله ييز بهرني سياست پلي کولو او د ګډ برخليک انساني ټولنې رامنځته کولو ته د چين پر ژمنتيا ټينګار وکړ. د غونډې په بيانيه کې د نړيوالې پراختيا د نوښت، د نړيوال امنيت د نوښت او نړيوال تمدني نوښت لپاره پر هڅو ټينګار شوی تر څو د څو قطبي برابرې منظمې نړۍ او ځانګړي اقتصادي نړيوالتوب له واقع کېدو سره مرسته شي.
د چيني عصريتوب د پرمخ بېولو لپاره د هر اړخيزو ژورو اصلاحاتو د پروسې له لارې چين غواړي چې د لوړې کچې اداري پرانيستنو پر مټ د نړيوال کېدو يوه نوې څپه رهبري کړي، له نړيوالو لويديځو هېوادونو سره د همکاريو له لارې د نړيوال اقتصاد بڼه بدله کړي او د متقابلو ګټو او ټولشمولتيا پر ځانګړنو سنبال د نړيوالتوب نوی مسير پرانيزي.